بلوچستان ءِ بنجاھی شھر شال ءَ پریس کلب ءِ دیم ءَ وائس فار بلوچ مسنگ پرسنز ءِ زورانسری بیگواھیانی بگیرءَ زھرشانی بنجل مروچی 5001 می روچءَ برجاہ اِنت۔ بلوچستان بار ءِ جنرل سیکرٹری چنگیز بلوچ ءُ دگہ وکیلاں اَتکگ ءُ گوں کھولاں یکجاھی درشان اِتگ۔
اے وھدءَ گل تنظیم ءِ وائس چیئرمین ماما قدیر بلوچ ءَ گُشتگ کہ بلوچ سیاسی باسکانی گیر کانودی زورانسری بیگواھیانی بگیرءَ جدوجھد برجاہ مان اِیت۔ آئی ءَ گُشتگ کہ گوستگیں 75 سالاں چہ زلم شدت ءُ زورزیاتی ءِ یک انچیں چاگرد ءِ ودی کنگ بیتگ، کہ اِدءَ وشیں آپ ءِ جاہءَ ھونانی شھجوہ تچگ ءَ اِنت۔
آئی گُشگ اَت کہ پاکستان ءِ روش گوں بلوچاں ھاکم ءُ گلامانی اِنت انچش کہ واھند ءِ گوں وتی گلام ءَ ھم نہ کنت ھزارانی کچ ءَ بے میاریں بلوچ زندمان گوں مرگ ءَ ھمگرنچ اَنت ءُ جتاھیں بندیگ جاھاں زندانی اَنت ءُ وتی جرمکاریانی بزانت ءَ شوھاز کنان ءَ وتی سرءَ زوراکی ءُ شدت سگگ ءَ اَنت۔
“آ اے ھم سرپد نہ اَنت کہ آ کجام جرمکاریانی پُشدر ءَ زوراکیانی آماچ اَنت ءُ آیانی کھول شُد ھڑتالی بنجل جتگ وتی دوستیگانی یل کنائنگ ءِ لوٹ کنان ءَ داں مرگ شُد ھڑتالی کیمپ جنگ ءَ لاچار بنت اِنت گُڑءَ لھتیں جھگیر کائنت ءُ آیاں دروگیں اوست دئینت ءُ شُد مرگ ھڑتال ءِ ھلاسی ءِ لوٹ کن اَنت کہ ما لھتیں روچانی تہءَ شمے دوستیں مردماں دیما کار اِنت بلے عملی گامگیج گندگ نہ بیت۔”
ماما قدیر بلوچ ءَ گُشتگ کہ وھدے زلم ءُ شدت ءُ جناورگری چہ ھداں سر گوز بہ بیت گُڑءَ مھلوک لاچار بنت کہ آیانی بگیر ءَ بہ اوشت اَنت گُڑءَ چُشیں راج انچیں تاگت جوڑ بنت ءُ دیما کائنت کہ آیانی دارگ ممکن نہ بیت اِنت۔