ھندوستان: مندر ءِ پَرش ءِ کپگ ءِ سبب ءَ بیران بیتگیں مردمانی کَچ 35 ءَ سر بیتگ اَنت

ھندوستان ءَ ھندو مزھب ءِ مراگش ءِ وھد ءُ مندر ءِ پَرش کپتگ ءُ چریشی ءَ سِی ءُ پنچ مردم بیران بیتگ اَنت-

ھال سرکنوکیں ادارہ اے ایف پی ءِ رد ءَ وئیل پشمبے ءِ روچ ءُ ریاست مدھیہ پردیش ءِ شھر اندور ءِ شری بالیشور مھادیو مندر ءَ ھما وھد ءَ پیش اتکگ بیتگ کہ اود ءَ بازیں ابادت گزار جاڑیگ بیتگ اَنت-

مندر ءِ یک چاتے ءِ سر ءَ لینٹر مان کنگ بیتگ ءُ پَرش جوڑ کنگ بیتگ ءُ زیادگیں زور ءِ سبب ءَ زمین ءَ ایر شتگ-

اندور ءِ دمگ مجسٹریٹ ءَ اے ایف پی ءَ گوں گوشتگ کہ سی ءُ پنچ مردم بیران بیتگ اَنت ءُ یک مردمے ءِ شوھاز داں انگت ءَ برجاہ اِنت-

سر وزیر نریندر مودی ءَ وئیل ءِ پدری درشان کتگ ءُ دمگدار، ریسکیور ءُ کمکی کار کنوکانی کارانی ترند کنگ ءِ کڈنی کتگ-

سر وزیر مودی ءِ کارگس ءَ اسرمندین مردمانی دو دو لک دیگ ءِ جار جتگ- ریاست مدھیہ پردیش ءِ وزیر داکلہ نروتم مشرا ءَ گوشتگ وئیل ءِ پٹ ءُ پول بندات کنگ بیتگ اَنت- بلے داں انگت ءَ ریسکیو آپریشن برجاہ اِنت ءُ زدگ بیتگیں مردم نادراہ جاہ ءَ برگ بوگ ءَ اَنت-

انڈیا ءِ ھندو دین ءِ مراگشانی وھداں وئیل گوست ءَ پیش اتکگ بیتگ اَنت ءُ ھمے سال ءِ بیست ءُ سَے جنوری ءَ ریاست تامل ناڈو ءَ دروپتی مندر ءَ مراگشے ءِ وھد ءَ کرینگ ءِ کپگ ءَ چار مردم بیران ءُ پنچ زدگ بیتگ اَنت-

رسانکدری رپورٹ ءِ رد ءَ وئیل رانی پت ءِ دمگ دروپتی مندر ءَ پیش اتکگ بیتگ – چم دیستگیں مردمانی رد ءَ کرینگ ءِ سر ءَ مورتیاں برگ ءَ بیتگ اَنت ھمے وھد ءَ ھشت مردم کرینگ ءِ دومی بھر ءَ سوار بیتگ اَنت-

چیر ءَ جاڑیگیں مردماں کرینگ ءِ سواریں مردمانی ڈن ءَ گپتگ ءُ ھمے وھد ءَ کرینگ برزی فٹ ءَ بیتگ ءُ پد ءَ وتی وس ءَ ڈن ءَ شتگ بیتگ ءُ چریشی ءَ مردم کپتگ اَنت –