بلوچستان ءِ تیاب دپی شھر گوادر ءَ مروچی مردمانی مزنیں کساسی ءَ حق دو تحریک ءِ مستر مولانا ھدایت الرحمان ءِ یل کنائنگ ءُ گوادر ءَ جنگ بیتگیں سیاسی بندشانی بگیرءَ زھرشانی روانک کش اِتگ۔
روانک ءَ بھرزیروکیں مردماں ترندیں اوگام جتگ ءُ مولانا ھدایت الرحمان ءِ یل کنائنگ ءِ لوٹ کُتگ ءُ آئی ءَ ھوار آیاں لوٹ کُتگ کہ گوادر ءَ برجاھیں سیاسی بندش زیت ءَ زیت ھلاس کنگ بہ بنت۔
روانک ءَ گوں تران کنان ءَ حق دو تحریک ءِ رھشون حسین واڈیلہ ءَ گُشتگ کہ گُشنت ما دیمروی ءِ ھلاپ اِنت، ما دیمروی ءِ ھلاپ نہ اِنت بلے چُشیں دیمروی مارءَ ھچ بر لوٹوک نہ اِنت کہ آودہ مئے لُٹءُ پُل برجاہ بہ بیت۔
آئی ءَ گُشتگ کہ جمھوری مردم اِنت ما دیمروی ءِ ھلاپ نہ اِنت بلے ھما دیمروی کہ لس مھلوک ءَ پہ بیت۔ مولانا ءِ میار چی اِنت کہ آ دزگیر کنگ بیتگ، سر وزیر گُشیت کہ ٹرالر ھلاس کنگ بیتگ اَنت اگں ٹرالر ھلاس اَنت گُڑءَ فشریز ءِ انسپکٹر کئے ءَ بیگواہ کُتگ ءُ بُرتگ۔
آئی ءَ گُشتگ کہ اگں جمھوری راہ بند کنگ بہ بنت ءُ کشندہ ٹولی ءُ سلکاریں مردماں لس مھلوک ءِ سرءَ مُشگ بہ بیت گُڑءَ ورناہ دیم پہ کوھاں مہ رؤنت دگہ کجءَ بہ رؤنت۔ یک کونسلر ءِ ھم سد ووٹ نہ گِپت ءُ سوبمند نہ بیت بلے بلوچستان ءَ دو سد ووٹ گِر اَنت ءُ سر وزیر جوڑ بنت ءُ گُشگ بیت کہ اے لس مھلوک ءِ جھگیر اَنت۔
آئی ءَ گُشتگ کہ سرکار لوٹیت ما تشدد ءِ نیمگ ءَ بہ رویں بلے ما اولی روچ ءَ چہ ھمے پیسلہ کُتگ کہ ما پر ایمنیں مردم اِنت ءُ پر ایمنیں وڑءَ وتی جدوجھد ءَ دیما بر ایں۔
آئی ءَ گُشتگ کہ ریاست ءَ پالیسیانی تہءَ بدلی نیارت گُڑءَ آ روچ دیر نہ اِنت بلوچستان ءِ تہءَ یک مردمے ھم پشت بہ کپیت کہ آ پاکستان ءَ گوں نندگ ءَ وش بہ بیت۔
آئی ءَ گُشتگ کہ ما لوٹ کنیں کہ گوستگیں روچاں فشریز کارندہ عبدالمطلب ءِ بیگواہ کنوک دزگیر کنگ بہ بنت۔
آئی ءَ گُشتگ کہ بلوچستان ءَ سرکار ءِ ھاسیں مردم ھما اَنت کہ منشیات پروش، دز ءُ ڈُنگ اَنت، مئے سرءَ اگں زلم ءُ زوراکی بیت ما ریاست ءِ بگیرءَ وتی پر ایمنیں جدوجھد ءَ برجاہ داریں۔
آئی ءَ گُشتگ کہ اسلام آباد ءَ عمران خان نندانک دنت گوں آئی ءَ نند ءُ نیاد بیت ءُ گوادر ءَ نندانک بیت گُڑءَ آیانی رھشون دزگیر کنگ بیت۔ آئی ءَ لوٹ کُتگ کہ گوادر ءُ کیچ ءِ ڈی سی زیت ءَ زیت مٹ کنگ بہ بنت۔
آئی ءَ گُشتگ کہ ما دیمروی ءِ ھلاپ نہ اِنت بلے ما گلامی ھم نہ من ایں۔ ما برابری لوٹ اِنت ءُ تھنا دیمروی ءِ نام ءَ ریپینگ نہ بئیں۔ وھدے ما راستی ءُ اگبالانی گپءَ کنیں گُڑءَ مارءَ گدار گُشگ بیت ءُ اگں چہ مارءَ جمھوری ءُ پر ایمنیں جدوجھد ءِ راہ پچ گرگ بہ بیت گُڑءَ ما لاچار بئیں کہ دگہ راہ بہ شوازیں۔