گوادر ءُ پنجگور ءَ سَے مردم زورانسری آوار جنی ءَ پد بیگواہ

سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءَ دگہ دو ورنا زورانسری آوار جتگ ءُ بیگواہ کتگ انت – وھدیکہ چہ پنجگور ءَ ھم ھال آیگ ءَ انت یک مردمے آوار جنگ ءُ بیگواہ کنگ بوتگ –

چہ گوادر ءَ آوار جنگ بوتگیں ورنایانی پجار وحید بلوچ ء ھاجی جھمنند امبی کلانچ ءُ شاہ جان ء غمداد جھمنند امبی کلانچ ءِ ناماں چہ بوتگ انت –

کھول ءِ مردماں ورنایانی آوار جنی ءِ ھبر راست کتگ ءُ گوشتگ کہ زورانسری آوار جنگ بوتگیں ھردو ورنا وارس انت کہ پوج ءَ گوستگیں شپ ءَ زورانسری آوار جتگ ءُ بیگواہ کتگ انت –

زانگ بہ بیت چدو پیسر ھم پاکستانی پوج ءَ وحید ءِ مستریں برات امیر بخش سال دوھزار چاردہ ءَ آوار جتگ ءُ بیگواہ کتگ کہ ھنگت گار ءُ بیگواہ انت –

گوستگیں روچ ءَ گوادر ءِ دمگ کلانچ ءَ ھمے کھول ءِ یک دگہ مردمے ھم آوار جتگ ءُ بیگواہ کتگ کہ آئی پجار حمید بلوچ ء بابو محراب ءِ نام ءَ بوتگ کہ ھنگت بیگواہ انت –

دومی نیمگ ءَ گوادر ءِ دمگ دڑامب ءُ نلینٹ میانی ھند ءُ دمگاں پاکستانی پوج ءِ جھلی ءُ برزی لشکر کشی برجاہ انت –

گڈی ھالاں تاں مروچی بوتگین لشکر کشی ءَ زمینی پوج ءِ ھمراھی ءَ جنگی بالگرداں ھم بھر زرتگ ءُ دو بالگرداں دڑامب ءِ دمگ تلاروک کئور، نلانی، جنکانی ءُ دگہ بازیں جاھاں چکر جتگ ءُ شیلنگ ھم کتگ –

چہ پنجگور ءَ ھال آیگ ءَ انت کہ پاکستانی پوج ءَ گوستگیں شپ ءَ نزیر نامیں مردمے چہ جندے گِس ءَ زورانسری آوار جتگ ءُ بیگواہ کتگ –

آوار جنگ بوتگیں نزیر احمد ءِ سیادی چہ رخشان انت ءُ آ ٹیل ءِ باپاری کنت – کھول ءِ گوشگ انت کہ نزیر گِس ءَ یکیں کمائینوک انت –

آھاں چہ واکدار ءُ انسانی ھکانی ادارھاں گوں لوٹ کتگ کہ نزیر اھمد ءِ یل کنائینگ ءَ وتی کرد ءَ پیلو بہ کن انت –