روکپتی بلوچستان ءَ گرانھادی ءِ پژدر ءَ مھلوک تکانسر

روکپتی بلوچستان ءَ کم پگاریں مردمانی واستا گرانھادی ءِ بار آیانی کوپگاں سگگ بوگ ءَ نہ اِنت چریشی ءَ بازیں کساسے ءَ مھلوک تکانسر اَنت-

لس مھلوک ءِ گوشگ اِنت کہ اود ءَ مردمانی کمیں پگار ءَ چریشی ءَ چہ آیانی گزران بوگ ءَ نہ اِنت کہ اود ءَ راشن ءُ دگہ وردنیانی نھاد کساساں گوستگ اَنت-

دمگ ءَ ھواریں چاگردی باسک زیردان بلوچ ءِ گوشگ اِنت کہ گرانھادی ھما کساس ءَ گیش بوتگ کہ اود ءَ ھمک لس گریب ءُ بزگ ءَ گون پُجگ سک گران اِنت-

زیردان بلوچ ءِ گوشگ اِنت کہ اود ءَ یک سیرے الواھو ماھیگ کساس سَے لَک ءُ پنجاہ ھزار تومن ءَ سر بیتگ کہ چریشی ءَ چہ اے گرانھادی لس مھلوک ءِ وس ءُ واک ءَ ڈن اِنت-

مھلوک ءِ گوشگ اِنت اے گرانھادی اگاں برجاہ بیت گڑا پہ گریب ءُ بزگاں زند ءِ گوازینگ مشکلیں رنگے ءَ بیت اِنت-

لس مھلوک ءَ چہ سرکار ءِ انتزامیہ ءُ واکداران لوٹ کتگ کہ اود ءَ سُبک دابیں رنگے ءَ وردنیانی نھاداں ایر بہ کنت دانکہ آیانی وس ءُ واک ءَ بہ بنت ءُ وتی گزران ءَ کُت بہ کن اَنت-