بلوچستان ریاستی زوراکیانی آماچ انت – ماما قدیر بلوچ

بلوچستان ءَ سیاسی باسک، نودربر دگہ تک ءُ پھناتاں سیادی داروکیں مردمانی زورانسری آوار جنی ءِ بگیری ءَ وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءَ نُھ سد ءُ شست ءُ ھشت روچ سرجم بوتگ انت –

مروچی بی ایس او ءِ سرکماش جہانگیر بلوچ، کمک سرکماش محمد اشرف بلوچ ءُ کابینہ ءِ دگہ رھشوناں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءَ فروری ماہ ھم ریاستی زوراکیانی تہ ءَ گوستگ، اگاں بچارے چشیں یک روچ ءِ ھم نگوستگ کہ نہ وشیں ھال ءِ نہ اتکگ اے ھال بہ اش نکتگ کہ مروچی ریاست ءَ وتی دست داشتگ انت –

آئی ءَ گوشتگ کہ سرجمیں ماہ ءَ اگاں یکے ءِ آوار جنی ءِ ھال اتکگ اگاں کسے ءِ ژانگولیں جون دست کپتگ ـ ھمک روچ ریاستی زوراکیاں گوں ایر شُتگ – ریاست ءَ وتی نوکیں شوربندیاں اے ماہ ءَ یک نیمگ ءِ بلوچ زالبولانی آوار جنگ بندات کتگ دومی نیمگ ءَ ژانگولیں جونانی چگل دیگ بندات کتگ – پاکستان ءَ بلوچ ءِ پُرایمنیں جھد ءَ درگان درگان کنگ ءِ ھاتر ءَ وتی زوراکیانی تہ ءَ گیشی آؤرتگ –

ماما قدیر بلوچ ءَ گوشتگ کہ درسیں بیگواھیں مردمانی یل نہ کنگ ءِ بگیری ءَ ءُ اقوام متحدہ ءِ دلگوش گور کنائینگ ءَ بلوچستان ءَ پرایمنیں کھد برجاہ بیت اشی ءِ مول مراد زورانسری آوار جنی ءِ جیڑہ ءُ بلوچستان ءِ تہ ءَ پاکستان ءِ زلم زوراکیاں جھان ءِ دیم ءَ پدر کنگ انت ءُ جھان چہ واب ءَ پاد کنگی انت کہ بلوچ چکچینی ءِ سر ءَ گامگیج بہ زوریت – مروچی پنجاہ، شست ھزار بلوچ پاکستان ءِ زنداناں بندیگ انت کہ ھمک روچ آھانی سر ءَ زوراکی کنگ بیت ءُ آ لٹ شاپ کنگ بنت ءُ شھید کنگ بنت ، آھانی ژانگولیں جون چگل دیگ بنت –

آئی ءَ گوشتگ کہ میڈیا ءِ گوش کر انت اے استحمار ءِ توار انت اے ھاکمانی توار انت، زوراک ءِ توار انت، زورگپتانی توار انت چہ اشاں امیت دارگی نہ انت –