یوکرین ءِ جنگ دومی سال ءَ سر بیتگ: میان اُستمانی پھناتاں روس تھنا

یوکرین ءِ جنگ دومی سال ءَ سر بیتگ بلے داں انگت ءَ ھلاسی ءِ نام ءَ نزانگ اِنت ءُ ھمے وڑ دومی نیمگ ءَ میان استمان ءَ یک منگ نامھے پیش کتگ کہ چریشی ءَ روس ءَ وتی لشکریانی واتر کنگ ءِ لوٹ ءَ کنگ ءَ اِنت-

برتانیہ ءِ ھال سرکنوکیں روئٹرزے ءِ رد ءَ آدینگ ءَ جی سیون ڈیھانی رھوشاں یوکرین ءِ واستا دگہ کمکی جاراں جن اَنت-

روس ءَ یوکرین ءِ سر ءَ اُرش ءَ یک سالے ءِ سرجم بوگ ءَ کیئف اتھادیاں آئی ءِ گون ءَ ھمدردی ءِ درشان کتگ-

پیرس ءَ ایفل ٹاور ءَ یوکرین ءِ سبز ءُ زرد رنگیں بیرک رژنا کتگ ءُ لندن ءَ یوکرین ءِ بیرک ءِ برزا بال دیگ بیتگ- برسلز ءَ ھم یورپی یونین ءِ ماڑیانی سر ءَ یوکرین ءِ بیرک ھم رنگانی توک ءَ رژنا کنگ بیتگ-

میان اُستمان ءِ جنرل اسمبلی ءَ پشمبے ءِ روچ ءَ جنگ ءِ یک سالے ءِ سرجم بوگ ءَ یک منگ نامھے منگ بیتگ کہ چریشی ءَ باز گچینیں رنگے ءَ ماسکو ءَ درایگ ءُ جنگ بندی ءِ لوٹ کنگ بیتگ اَنت-

منگ نامہ ءِ ھک ءَ یک سد ءُ چل ءُ یک ووٹ دیگ بیتگ اَنت ایشی ءَ سی ءُ دو ڈیھ جاڑیگ نہ بیتگ اَنت شش ڈیھاں ایشانی توک ءَ بیلاروس، گوریچانی کوریا، اریٹیریا، مالی، نکاراگوا ءُ شام ھوار اَنت- ایشاں روس ءِ گون ءَ ھمگرنچی کتگ ءُ منگ نامہ ءِ ھلاپ ءَ ووٹ داتگ- روس ءِ نزیکیں اتھادی چین ھم منگ نامہ ءِ وھد ءَ جاڑیگ نہ بیتگ-

میان ءَ اُستمان ءَ روس ءِ کسان سپیر دمتری پولیانسکی ءَ میان اُستمان ءَ آئی ءِ کاروائی ءَ را بے کار گشتگ-

منگ نامہ ءِ درگت ءَ یوکرین ءِ سروک ولادیمیر زیلنسکی ءَ یک ٹویٹے ءَ گوشتگ کہ اے منگ نامہ یوکرین ءِ واستا میان اُستمانی پھناتاں یک مھکمیں سُٹوکے –

دومی نیمگ ءَ یورپی یونین ءَ یک رندے پد ءَ روس ءِ گون ءَ ایمنی ءِ گپ ءُ تران ءَ چشکہ یوکرین ءِ وتواجھی ءُ دمگی پھریزگ ءِ شرپ ءَ جنگی جرمانی پرکنگ ءُ پسھی ءِ سر ءَ نہ اِنت ءُ اے گمان رد کتگ-

یورپی یونین ءِ ڈنی کاردار ءُ سلامتی پالیسی ءِ مزنیں رھشون جوزپ بوریل ءَ عرب نیوز ءَ گوں گپ کنان ءَ گوشتگ کہ مئے واستا آ ھما چار رنگیں لکیر اِنت چریشی ءِ توک ءَ گپ ءُ تران بہ بیت –

دومی نیمگ ءَ وائٹ ھاؤس ءَ آدینگ ءِ روچ ءَ امریکہ ءِ سروک جوبائیڈن جی سیون رھشون ءُ زیلنسکی ءَ گند ءُ نندی کنت ءُ روس ءِ کمک کنوکیں ڈیھانی سر ءَ بندش جنگ ءِ ٹاہ ءَ دنت-

واشنگٹن ءَ گوشگ بیتگ کہ چین یوکرین ءِ جنگ ءَ روس ءَ سلاہ دیگ ءِ سوڑگ ءَ اِنت اے یک ھنچین گامگیجے چریشی ءَ روس ءُ چین ءُ دومی نیمگ ءَ یوکرین ءُ امریکہ ءِ چیردستی ءَ برجمیں نیٹو لشکر ءِ اتھادیانی میان ءَ جنگ شت کنت –

زانگ بہ بیت امریکہ ءُ روکپتی ڈیھانی واکدارانی توک ءَ لھتے گوش ایت کہ یوکرین ءِ جنگ ءَ روس ءَ کساس دو پوجی کشگ ءُ زدگ ءُ یا تاوانباری بیتگ اَنت گوستگین سال ءِ نومبر ءَ امریکہ ءِ یک مزنیں پوجی جنرلے ءَ گوشتگ ات کہ ھردوکیں نیمگاں کساس یک لک پوجی ءَ گیش مرتگ ءُ زدگ بیتگ اَنت-