متھدہ عرب امارات ءِ کار ءُ باری گر ءُ دار کنوکیں وزیر عبداللہ بن طوق المری ءَ گوشتگ کہ انڈیا ءُ امارات ءِ میان ءَ دَہ سال ءِ واستا کسٹم ڈیوٹی ھلاس کنگ ءِ چن ءُ لانچ بوگ ءَ اِنت-
نئی دھلی ورلڈ بزنس سمٹ ءِ تران ءَ آئی ءَ گوشتگ کہ جتا جتائیں باپاری تکاں امارات ءُ انڈیا ءِ میان ءَ سیادی گھتری ءِ نیمگ ءَ روگ ءَ اَنت ءُ ھردوکیں ڈیھانی میان ءَ سیادی یک راجدپتری تاکے ءَ روگ ءَ اِنت-
امارات الیوم ءِ رد ءَ باپاری وزیر ءِ گوشگ اِنت نئی دھلی ءَ ورلڈ بزنس سمٹ انڈیا ءُ امارات میان ءَ مزنیں باپاری مسامے ءَ پد یک سالے ءِ گوزگ ءَ بیتگ-
آئی ءَ گوشتگ کہ اے مسام ھردوکیں ڈیھانی نھادیانی سرجمی ءَ باپاری داری ءِ جوانیں کردے پیلو کنت اے ھردوکیں ڈیھانی میان ءَ ھشتاد درسد ءَ گیش کسٹن ڈیوٹی ھلاس کنگ ھوار اَنت ءُ داں دَہ سال ءِ وھد ءَ دَہ ھزاد چیزانی سر ءَ کسٹم ڈیوٹی سرجم ءَ ھلاس کنگ ءِ دل ءَ اِنت –
عبداللہ بن طوق المری ءَ گوشتگ کہ مسام ءَ ھردوکیں ڈیھاں سال دوھزار ءُ بیست ءُ دو ءِ وھد ءَ یک سد ءُ ھشتاد ارب درھم ءِ باپار بیتگ ایشی ءِ توک ءَ پیٹرول ھوار نہ اَنت –
آئی ءَ گوشتگ کہ سال دوھزار ءُ بیست ءُ یک ءِ وھد ءَ دَہ درسد گیش باپار بیتگ امارات اے وھد ءَ انڈیا ءِ سَیمی میان اُستمانی باپاری شریداران اِنت-
امارات ءِ وزیر ءَ دیمتر ءَ گوشتگ کہ آیوکیں وھداں امارات ءُ انڈیا ءَ زرکاری ءَ گیش کنگ لوٹ ایت امارات ءَ ھم ریاستی پوڑی گری ءَ دیمروی ءِ ھاتر ءَ دَہ ارب ڈالر زرکاری ءَ داتگ –
ایشی ءَ ھوار ھوار انڈیا امارات ءِ زرکاری ءِ گیش کنگ اِنت انڈیا ءَ یازدہ ھزار نوکیں کمپنیاں دوھزار ءُ بیست ءُ دو ءَ امارات ءَ ھوارینتگ اَنت ایشی ءِ توک ءَ انڈیا ءِ کمپنیانی کساس ھشتاد ءُ سَے ھزار گیش بیتگ –