زاھدان ءُ ھاش ءَ ایرانی لشکر ءَ بازیں مردمے ودی بوگ ءِ سرٹیفکٹ ءِ نہ بوگ ءِ سر ءَ دزگیر کتگ انت

روکپتی بلوچستان ءِ دو جتا جتائیں جاھاں ایرانی لشکر ءَ بازیں مردمے دزگیر کنگ ءَ پد گون وت برتگ اَنت-

اھوالانی تہ ءَ گوشگ بیتگ کہ اے مردمانی گور ءَ ودی بوگ ءِ سرٹیفکٹ ءِ نہ بوگ ءِ پژدر ءَ ایرانی پولیس ءَ مردم گپتگ ءُ برتگ اَنت-

گرگ بیتگیں مردمانی تہ ءَ پنچ کسانی پجار مفتی رضا رخشانی، مولوی عبدالرؤف رخشانی، مولوی عبدلسلام شھلی بر، اسماعیل خارکوھی ءُ بھنام صفرزئی ءِ ناماں زانگ بیتگ اَنت-

اھوالانی تہ ءَ گوشگ بیتگ کہ ایشانی توک ءَ عبدالسلام شھلی یک ادارے ءَ پد یل کنگ بیتگ ءُ آ دگہ داں انگت ءَ بندیگ اَنت-

دومی نیمگ ءَ ایرانی “سرھنگ “پولیس ءِ آفیسر علی رحیمی ءَ سرکاری رسانکدر ءَ گون گپ کنان ءَ گوشتگ کہ سیستان و بلوچستان ءَ یک سد ءُ بیست مردم زاھدان ءُ ھاش ءَ گپتگ اَنت اے مردم درملکی اَنت –

ھالانی تہ ءَ گوشگ بیتگ کہ اے مردمانی گور ءَ ودی بوگ ءِ سرٹیفکٹ ءِ نہ بوگ ءِ پژدر ءَ سیمسری واکداراں اے مردم اوگانستان ءِ ھاک ءَ واترینتگ اَنت-

دومی نیمگ ءَ دمگی مردمانی رد ءَ اے مردم کرناں چہ ھمے ھند ءُ زمینانی سر ءَ نندوک اَنت ءُ آیانی بازیں سالانی نندگ ءُ جھمنندی ءَ ابید ھم ایرانی واکدار آیاں دزگیر کنگ ءُ درملکی کنگ ءِ بھانگ کنگ ءُ لڈینگ ءَ اِنت-