بلوچستان : جتاجتائیں دمگاں دگ ءُ تیرگواری ءِ وئیل آسر ءَ چار مردم بیران، ھشت ٹپی بیتگ اَنت

بلوچستان ءِ جتائیں دمگ لسبیلہ ءُ ھُزدار ءُ نصیرآباد ءَ دگ ءُ تیرگواری ءِ وئیلانی آسر ءُ چار مردم بیران ءُ ھشت ٹپی بیتگ اَنت-

گیشیں ھالانی رِد ءَ لسبیلہ ءَ تُرندیں دنزیں سبب ءَ ایکو شھدگ سر ءَ رانا بھٹ ءِ نزیک ءَ کسانیں گاڑی ءُ کوچ ءِ میان ءَ ڈک ورگ ءَ یک کسانیں زھگے بیران ءُ ھشت مردم ٹپی بیتگ اَنت-

وندر ءِ دمگ رانا بھٹ نزیک ءَ بُنجاھی ایکو شھدگ سر ءَ تُرندیں دنزیں سوب ءَ کسانیں گاڑی ءُ کوچ میان ءَ ڈک ورگ ءِ سوب ءَ گاڑی ءَ سوار ھشت مردم ٹپی بیتگ اَنت وھدے کہ یک نُھ سالی ئیں زھگے بیران بیتگ-

وئیل ھال رسگ ءَ وندر پولیس ءُ ریسکیو 1122 ءِ کاردار وئیلجاہ ءَ سر بیتگ اَنت ءُ وئیل ءَ ٹپی بیتگیں مردماں الاج کنگ ءَ پد ریسکیو سینٹر وندر ءِ ایمبولینس ءَ ریسکیو سینٹر ءَ برگ ءَ پد سک ٹپی بیتگیں سے مردم گیش الاج ھاتر ءَ کراچی ٹرما سینٹر ءَ برتگ اَنت وھدے کہ وندر پولیس ءَ نُھ سالی ئیں زھگ لاش چست کتگ ءُ گیشیں چار ءُ ٹپاس ءَ پد کھول ءِ دست ءَ داتگ-

ھمے وڑ ھُزدار ءَ تُرند رؤکیں ٹریکٹر ءَ غلامی چوک نزیک ءَ ورنایے لگت داتگ- لاش ءِ چار ءُ ٹپاس کنگ ھاتر ءَ نادُراھجاہ ءَ برتگ-

وڈھ ءِ دمگ دراکھالہ ءَ چات ءِ لُمبگ ءَ چہ یک پوریاگرے عبدالجلیل بارانزئی نامیں مردمے بیران بیتگ- بیران بیتگیں پوریاگر ءِ سیادی چہ دراکھالہ وڈھ ءَ اِنت-

انچش نصیرآباد ءِ تھسیل چھترتھانہ فلیجی ءِ ھاک ءَ پت ءَ وتی کسانیں زھگ تیرانی نشانگ کتگ، کسانیں سالی ئیں زھگ ءِ زورانسری آروس مکن کنگ ءَ چہ پت ءَ تیرگواری کتگ ءُ کُشتگ- گیشیں پٹ ءُ پول انتزامیہ ءَ کنگ ءَ اِنت-