ریاست زھگ ءُ زالبولاں ھم آوار جنگ انت – شال ءِ زھرشانی

مروچی سَے شمبے ءِ روچ ءَ بلوچستان ءِ بنجاھی شھر شال ءَ پریس کلب ءِ دیم ءَ بیگواھیں رحیم زھری ءِ آوار جنی ءِ بگیری ءَ بیگواھیں مردمانی پانکجنیں گل وائس فار بلوچ مسنگ پرسنز ءُ کھول ءِ نیمگ ءَ زھرشانی کنگ بوتگ –

زھرشانی ءَ زورانسری آوار جنگ بوتگیں مردمانی کھول، سیاسی پاٹی ءُ نودربر گلاں ھوار سول سوسائٹی ءَ سیادی داروکیں مردماں مزنیں کچے ءَبھر زرتگ ، درنگاز کنوکاں زورانسری آوار جنگ بوتگیں مردمانی اکس گون بوتگ انت ءُ آھانی یل کنگ ءِ لوٹ کتگ –

ھمے وھد ءَ درنگاز کنوکانی گوشگ ات کہ مردمانی زورانسری آوار جنی ھمک روچی کار ءِ جوڑ بوتگ، راجداریں پاٹیانی اے درگت ءَ ھچ نگوشگ پدردی یے ، بلوچستان ءِ تہ ءَ ھر یک مردمے ءَ بیگواھیں مردمانی ھاتر ءَ توار چست کنگی انت –

آھانی گوشگ ات کہ اگاں مروچی شما بیگواھیں مردمانی ھاتر ءَ گپ نہ جن یے باندا شما آوار جنگ بہ ئے، نوں بلوچستان ءَ زالبول ھم پھریز نہ انت –

درنگاز کنوکانی گوشگ ات کہ زِر ءُ مڈیانی لٹ ءُ پُل ءَ ھوار مئے ورنایاں ھم آوار جنگ ءَ انت – پرویز مشرف ءِ وھدے آپریشن انت کہ بلوچستان ءَ برجاہ انت ءُ گوستگیں بیست سال انت کہ ورنا آوار جنگ بوگ ءَ انت – ھمے ھال آیگ ءَ انت کہ رحیم زھری ءِ لوگبانک یل کنگ بوتگ – رحیم زھری ءَ اگاں کتکاری ءِ کتگ گڑا آمیدگس ءَ ارگ بہ بیت –

وائس فار بلوچ مسنگ پرسنز، بی ایس او، نیشنل پاٹی، بی این پی ، نیشنل ڈیموکریٹک ، عوامی نیشنل پارٹی، پشتونخواہ، ہزارھاں ھوار دگہ پاٹی ءُ نودربر گلانی ترانکاراں وئیل ءِ پٹ ءُ پولی ءِ لوٹ کتگ ءُ گوشتگ کہ رحیم زھری، رشیدہ زھری ءُ آئی ءِ کھول سَے فروری ءَ آوار جنگ بوتگ انت دو روچ ءَ پد کسانسالیں زھگ ءُ پیرزالیں مات یل کنگ بوتگ انت ءُ مروچی دہ روچانی گوزگ ءَ پد رشید ھم یل کنگ بوتگ اے دھیں روچاں آ زنداناں بندیگ کنگ بوتگ ءُ آئی ءِ لوگواجہ انگت بیگواہ انت آ زاھر کنگ بہ بیت ءُ پٹ ءُ پول بہ بیت –

زانگ بہ بیت مروچیگیں زھرشانی زورانسری آوار جنگ بوتگیں رشیدہ زھری ءُ آئی ءِ لوگواجہ رحیم زھری ءِ ھاتر ءَ بوتگ کہ رشیدہ زھری یل بوتگ ءُ وتی گِس ءَ سر بوتگ بلے آئی ءِ لوگواجہ رحیم زھری ھنگت بیگواہ انت ءُ درنگاز کنوکاں آئی ءِ وش ءُ سلامتی یل کنگ ءِ لوٹ کتگ –

درنگاز کنوکاں وزیر داخلہ ضیا لانگو ءِ درشان رد کتگ ءُ گوشتگ کہ زوراک ھما وڈ اشانی دپ ءَ دنت اے ھما وڑ گوش انت –

زانگ بہ بیت رحیم ءُ رشیدہ زھری ءِ زورانسری آوار جنی ءِ بگیری ءَ ھب چوکی، تربت ءَ ھوار مروچی شال ءَ شانزدہ فروری ءَ ھزدار ءَ زھرشانی کنگ بوگ ءَ انت –

دومی نیمگ ءَ چاگردی ترامجاہ ٹویٹر ءَ بلوچ سندھی ، پشتون ءُ مھاجراں ھوار دگہ ایکٹوسٹ زورانسری آوار جنی ءَ ترندی ءَ گوں ایر جنگ انت ءُ اشی ءِ گر ءُ دار ءِ لوٹ ءَ کنگ ءَ انت –

زانگ بہ بیت رشیدہ زھری ءُ آئی ءِ لوگواجہ رحیم زھری، تِری ءُ گون ھمراھے دو زھگاں سَے فروری ءَ چہ شال گیشکوری ٹاؤن ناشناس ءَ آوار جنگ بوتگ انت بیگواھیں محمد رحیم زھری ءِ مات ءُ کسانیں زھگ گوستگیں روچاں یل بوتگ انت ءُ مروچی رشیدہ ھم یل کنگ بوتگ بلے رحیم زھری ھنگت بیگواہ انت –