ھوشاپ: پولیس ءِ زھرشانی کنوکانی سر ءَ بیڑ، تیرگواری

بلوچستان ءِ دمگ چہ کیچ ءَ پاکستانی پوج ءِ دست ءَ ورنا ءِ آوار جنی ءِ ھلاپ ءَ کھول ءُ دمگی مردمانی نیمگ ءَ سی پیک دگ ءَ نندانکی زھرشانی ءِ سر ءَ گوستگیں شپ ءَ پولیس ءَ بیڑ برتگ-

دی بلوچستان پوسٹ ءَ سر بیتگیں تامربنداں گندگ بیت اِنت بیگواھیں زمان بلوچ ءِ یل کنگ ءِ واستا برجاھیں زھرشانی ءِ ھلاس کنگ ءَ گوشگ ءَ اَنت بلے کھول ورنا ءِ یل کنگ ءَ داں زھرشانی ءِ برجاہ دارگ ءِ لیکھ اش داشتگ-

ھمے میان ءَ نزیک ءَ ترندیں تیرگواری ءِ بندات بیت اِنت بلے ایشی ءَ ابید ھم زھرشانی کنوکاں وتی زھرشانی برجاہ داشتگ-

زانگ بہ بیت چہ گوستگیں روچ ءَ بیگواھیں زمان بلوچ ءِ نیمگ ءَ کیچ ھوشاپ ءِ ھند ءَ شھدگ بند کنگ بیتگ ءُ دگ ءِ سر ءَ روانی مھتل کتگ اَنت-

زمان بلوچ سَے روچ ءَ پیش چہ تربت ءَ پاکستانی پوج ءَ دزگیر کتگ ءُ گون وت اش برتگ چریشی ءَ پد آ دیم ءَ آرگ نہ بیتگ –

ورنا ءِ زورانسری آوارجنی ءِ درگت ءَ کھول ءَ پریس کانفرنس کنان ءَ گوشتگ کہ زمان ء سپاھان کیچ ءِ دمگ بالگتر ءِ جھمنند اِنت آ دہ فروری دوھزار ءُ بیست ءُ سَے ءَ آدینگ ءِ روچ ءَ تربت بازار ءَ آوار جنگ بیتگ پد ءَ آئی ءِ درگت ءَ ھچ ھال نیست اِنت-

کھول ءِ گوشگ ات کہ اے اولی رند نہ اِنت زمان زورانسری آوار جنی ءِ آماچ کنگ بیتگ بلکیں ایشی ءَ پیش آئی ءِ برات ماجد نُھ جون دوھزار ءُ بیست ءَ سیکورٹی ادارھاں آوار جتگ ءُ شش ماہ ءِ ترندیں لٹ ءُ کُٹ ءَ پد یل کتگ –

کھول ءِ گوشگ ات کہ سکیورٹی ادارہ یکشل ءَ مئے کھول ءَ نشانگ کنگ ءُ برگ ءَ اِنت –

کھول ءِ گوشگ ات کہ زمان ءِ زند ءِ سر ءَ مارا ترس اِنت-