ھمے گوزوکیں ماہ ءِ ھشت فروری ءَ ایران ءِ لشکر ءِ دست ءَ دزگیر بیتگیں روکپتی بلوچستان ءِ دمگ کسر کند ءِ جھمنندیں جنک کبری ھوتی داں انگت ءَ یلو کنگ نہ بیتگ –
کبری ھوتی ھشت فروری ءَ روکپتی بلوچستان ءِ ھند ایرانشھر ءَ یک لوگے ءِ سر ءَ ایرانی لشکر ءُ چیریں ادارھانی کارندھاں آوار جتگ ءُ برتگ –
اھوالانی تہ ءَ گوشگ بیتگ کہ کنری ھوتی گوستگیں روچ ءَ روکپتی بلوچستان ءِ بنجاھی شھر زاھدان ءِ زاندان ءَ آئی ءِ کھول ءِ گون ءَ گندوک کنگ بیتگ-
زاندان واکداراں گوشتگ کہ اگاں شما وتی مردم ءَ داں آمیدگسی چار ءُ ٹپاس ءَ ڈن ءَ کنگ لوٹ ئے گڑا زمانت زیری ءَ شمارا باز چیزانی آرگ کپ ایت-
کبری ھوتی ءِ سر ءَ بھتام اِنت آئی ء چاگردی ترامجاھاں ڈیھ ءِ بگیری ءَ سیاسی چست ءُ ایراں دزمانجنی کتگ ءُ چریشی ءِ بھتام ءَ آ دزگیر کنگ بیتگ-
کبری ھوتی بیست ءُ دو سالی ئیں یک جنکے آ شھدربرجاہ ءِ نودربرے ءُ کسر کند ءِ نندوک اِنت-
سال دوھزار ءَ بیست ءُ دو ءَ روکپتی بلوچستان ءَ سیاسی ءُ چاگردی باسکاں ھوار ھوار کساس سَے سد ءُ پنچ کس دزگیر کنگ بیتگ اَنت کہ ایشانی توک ءَ گیشتری بھر چھبار ءَ پانزدہ سالی ئیں جنکو ماھو بلوچ ءِ گون ءَ پولیس آپیسر ءِ زوراکیاں پد بیوکیں زھرشانیانی وھداں دزگیر کنگ بیتگ اَنت-