ترکی ءُ شام: زمین چنڈ ءَ بیران بیتگیں مردمانی کساس 33 ھزار ءَ سر بیتگ اَنت

ترکی ءِ واکداراں گوستگیں ھپتگ ےَ بیوکیں کھرین زمین چنڈ ءَ کپوکیں ماڑی ءِ جوڑ کنوکیں کنٹریکٹرز ءِ بگیری ءَ پٹ ءُ پول بندات اِنت-

ھال سرکنوکیں ادارہ ایسوسی ایٹڈ پریس ( اے پی) ءِ رد ءَ ھپت ٹک ھشت ءِ زور ءَ بیوکیں زمین چنڈ ءَ پد روکپتی زربار ءَ ترکی ءُ شام ءِ گوریچانی نیمگ ءَ بیوکیں بیرانیانی کساس 33179 ءَ سر بیتگ اَنت-

چریشی ءَ پیش میان اُستمان ءَ گشتگ ات کہ بیرانیانی کساس پنجاہ ھزار ءَ داں سر بیت کنت – ھردوکیں ڈیھاں کپتگیں دیولانی چیراں کپتگیں لاشانی پٹ ءُ پول ءُ کشگ ءِ کار برجاہ اِنت ءُ گمان بوگ ءَ اِنت بیرانیانی کساس گیشتر بوت کنت-

ترکی ءِ وزیر انساپ بیکر بوزاگ ءَ تباہ بیوکیں ماڑی ءِ جوڑ کنوکیں یک سد ءُ سی ءُ مردمانی بگیری ءَ پٹ ءُ پول بندات کتگ-

دومی نیمگ ءَ زانتکارانی رد ءَ ترکی ءَ بازیں شھریاں زمین چنڈ ءِ آسر ءَ کھر ءَ نابودی کاری ءِ جوڑ کرتگین ماڑیانی سبب گوشتگ اَنت-

اے پی ءِ رد ءَ ترکی ءَ جوڑ بیوکیں ماڑی بس زمین چنڈ ءِ رکگ ءَ بس کاگدانی توک ءَ اَنت بلے راستی ءَ ایشانی سر ءَ باز کم امل بیتگ اَنت-

ترکی ءِ سرکاری ھال سرکنوکیں ادارہ انادولو ءِ رد ءَ اے پٹ ءُ پول ءِ ھاتر ءَ گازی انتپ اُستان ءَ دو مردم دزگیر کنگ بیتگ اَنت آیانی سر ءَ بھتام اِنت کہ آیاں جوڑ کرتگیں یک ماڑی ءِ توک ءَ گیش کوٹی ءِ جوڑ کنگ ءَ آئی ءِ یک ستون ءِ دور کرتگ-