ھب ءَ بیگواھیں بلوچ زالبول رشیدہ زھری ءُ آئی ءِ لوگواجہ ءِ آوارجنی ءِ بگیری ءَ زھرشانی

ھمے سال ءِ سَے فروری ءَ چہ شال ءَ پاکستانی پوج ءِ دست ءَ زورانسری آوار جنگ بوتگیں رشیدہ زھری ءُ رحیم زھری ءِ کھول ءِ نیمگ ءَ مروچی لسبیلہ پریس کلب ھب ءِ دیم ءَ زھرشانی روانک ءِ کشگ بوتگ –

روانک لسبیلہ پریس کلب ءِ دیم ءَ بندات بوتگ چہ ھب ءِ بنجاھی بازار ءَ اوگام جنان ءَ واتر پریس کلب ءِ دیم ءَ اتکگ ءُ ھمدا زھرشانی کنگ بوتگ –

کہ اودا مزنیں کچے ءَ بلوچ زالبول ءُ زھگاں بھر زرتگ، اے زھرشانی روانک ءَ بلوچ راجداریں رھشون زانتکاراں تران کنان ءَ رشیدہ بلوچ ءُ رحیم بلوچ ءِ زورانسری آوار جنی ترندی ءَ گوں ایرجتگ ءُ گوشتگ کہ ریاستی لشکر ءَ وتی ملکی کانود ءُ رھبندانی بگیری کنان ءَ سَے فروری ءَ چہ شال ءِ دمگ گیشکوری ٹاؤن ناشناس کالونی ءَ رحیم زھری ءچاکر خان زھری ءُ آئی یک سالی جنکویں چُک دعا، چارسالی زھگ یحییٰ ، لوگبانک رشیدہ زھری ءُ مات بس ھاتون درکانودی آوار جتگ ءُ بیگواہ کتگ انت کہ پدا رند ءَ بس ھاتون ءُ آئی ءِ نماسگ یل داتگ انت وھدیکہ رشیدہ ءُ رحیم ھنگت ریاستی زنداناں بندیگ انت – ریاستی لشکر ءُ آئی ءِ چیریں ادارھانی یکشل ءَ بلوچ زالبول ءُ زھگانی زورانسری آوار جنی انسانی ھکانی لگتمالی یے –

آھانی گوشگ ات کہ ھمے ماہ ءَ فروری ءَ جتا جتائیں جاھاں ژانگولیں جون دور دیگ بوتگ ءُ بلوچستان ءِ بازیں دمگان مردم زورانسری آوار جتگ ءُ بیگواہ کتگ انت – اے ملک ءِ تہ ءَ بلوچ، سندھی ءُ پشتون پھریز نہ انت ھمک روچ مردم درکانودی آوار جنگ بوگ ءَ انت، اسٹیبلشمنٹ ءِ دیم ءَ ملکی آمیدگسانی ارزشت ءِ نیست کہ حفیظ زھری درور ءَ پدر انت کہ آمیدگس ءِ نیمگ ءَ یل بوگ ءَ پد نیم راہ ءَ چیریں ادارھانی کارمنداں آ جتگ ءُ دوبر آوار جنگ ءِ کوشست کتگ چریشی ءَ اے گپ پدر بیت کہ ملک ءِ تہ ءَ آمیدگسانی ارزشت نیست – بیگواھیں مردمانی ھاتر ءَ کمیشن جوڈ کنگ بوتگ بلے اے وتگڑیں کمیشن ءُ انسانی ھکانی ادارہ بلوچستان ءَ درکانودی زورانسری آوار جنیانی درگت ءَ بے وس انت –

لسبیلہ پریس کلب ءِ دیم ءَ بوتگیں زھرشانی ءَ نیشنل ڈیموکریٹک پاٹی ءِ بنجاھی آرگنائزر شاھزیب بلوچ، اے این پی دمگی سرکماش لالا منان افغان، بی ایس او ءِ گوستگیں سرکماش عمران بلوچ، بلوچ اسٹوڈنٹس فرنٹ ھب ھنکین ءِ سرکماش حمل بلوچ، انسانی ھکانی باسک عبداللہ بلوچ، بی ایس او پجار ھب ھنکین ءِ سرکماش عارف بلوچ، نواز برفت ءُ دگہ مردماں تران کتگ ءُ وتی ھیال درشان اِتگ انت ءُ ھستیں وھدے سرکار ءُ میان استمانی انسانی ھکانی ادارھاں گوں لوٹ کتگ کہ بیگواھیں رشیدہ بلوچ ءُ رحیم بلوچ ءِ وش ءُ سلامتی یل کنگ ءَ وتی کرد ءَ پیلو بہ کن انت –