زمان بلوچ ءِ دوبر زورانسری آوار جنی ءُ ڈاکٹر واحد گِس ءَ بیڑ برگ ءِ بگیری ءَ پریس کانفرنس

زمان بلوچ ءِ دوبر زورانسری آوار جنی ءُ ڈاکٹر واحد ءِ گِس ءِ سر ءَ پھازگی لشکر ءِ بیڑ برگ ءُ زوراکی ءِ بگیری ءَ مروچی کیچ ءِ بنجاھی شھر تربت ءُ کراچی ءَ آھانی کھول ءِ نیمگ ءَ پریس کانفرنس کنگ بوتگ –

کیچ ءِ دمگ بالگتر ءِ جھمنند زمان بلوچ ءِ کھول ءَ تربت ءُ کراچی ءَ پریس کلب ءَ اھوالکاراں گوں تران کنان ءَ گوشتگ کہ زمان ء سپاھان کہ کیچ ءِ دمگ بالگتر ءِ جھمنند انت آ دھ فروری دوھزار بیست ءُ سَے ءَ آدینگ ءِ روچ ءَ چہ تربت ءِ بازار ءَ زورانسری آوار جنگ ءُ بیگواہ کنگ بوتگ دو روچ گوزگ ءَ پد ھم آئی ءِھچ وڈیں ھال اھوال نیست ـ ھمائیں کہ زمان بیگواہ انت آئی ءِ کھول ءِ زند ازاب ءِ تہ ءَ گوزگ ءَ انت ءُ آئی ءِ راہ ءَ چارگ انت –

آھانی گوشگ ات کہ اے اولی رند نہ انت کہ زمان زورانسری آوار جنگ ءُ بیگواہ کنگ بوتگ بلکنہ چدوپیش ھم زمان بلوچ ءُ آئی ءِ برات ماجد بلوچ سال دوھزار بیست ءَ نُھ جون ءَ پھازگی لشکر ءَ آوار جتگ ءُ بیگواہ کتگ انت کہ تاں شش ماہ ءَ لٹ شاپ کُتگ ءُ پدا یل داتگ انت –

آھانی گوشگ ات کہ دو روچ ساری ایف سی ءُ چیریں ادارھانی کارمنداں یک رندے پدا درکانودی زمان آوار جتگ ءُ بیگواہ کتگ دو روچانی گوزگ ءَ پد ھم آئی ءِ ھچ ھال ءُ اھوال نیست کہ پھازگی لشکر ءَ کجا برتگ ءُ آ چون انت –

آھانی گوشگ ات کہ پھازگی لشکر مدامی مئے کھول ءِ سر ءَ زوراکی کنگ ءَ انت کھول ءِ مردماں نشانگ کنگ ءُ زورانسری آوار جنگ ءُ بیگواہ کنگ ءَ انت – آدینگ ءِ روچ ءَ زمان ءِ آوار جنی ءَ پد پھازگی ادارھاں گوستگیں روچ ءَ پد ءَ مئے گِس ءِ سر ءَ بیڑ برتگ ءُ چادر ءُ چاردیوالی لگتمال کتگ زوراکی کنان ءَ زھگ ءُ زالبول جتگ انت، گرانھادیں سامان پروشتگ انت –

آھانی گوشگ ات کہ پھازگی ادارھاں زالبولانی سر ءَ توپک داشتگ ءُ بیھار داتگ انت گوشتگ کہ کھول ءِ زالبولاں ھم آوار جن ایں – مئے کھول بازیں وھدے بیت کہ دلسیاہ کنگ بوگ ءَ انت – پنچ روچ ساری مئے کھول ءِ باسک ءِ تربت بازار ءَ کہ وتی پرپٹ ءَ سوار بوتگ ایف سی کارمنداں آ ڈیکر کتگ ءُ دور داتگ پدا لٹ شاپ ھم کتگ –

آھانی گوشگ ات کہ ما پُرایمن ءُ جمھوری مردم ایں ملکی کانودانی پلامرزی ءَ ابید ھم ریاستی ادارھانی زوراکی پھم ءَ ڈن انت – ما دستگوشیں لس مردم ایں بلے ما نزانیں کہ پھازگی ادارہ مارا کجام کتکاریانی سزا ءَ دیگ انت –

آھاں گوشتگ کہ ما چہ سرکار ءَ دگہ ھچی نہ لوٹ ایں بلکیں وتی کھول ءِ پھریز ءَ لوٹ ایں – زمان بلوچ ءِ زند ءِ درگت ءَ مارا تُرس انت ھمے ھاتر ءَ پھازگی ادارہ انسانی ھمدردی ءِ رِد ءَ زمان ءَ یل بہ کن انت – ما چہ برزی تبک ءُ پھازگی ادارھاں لوٹ کن ایں کہ زمان ءَ یل بدئینت ءُ مئے کھول ءِ سر ءَ وتی زوراکیاں بند بہ کن انت ءُ درسیں زلم زوراکیانی بگیری ءَ گامگیج زورگ بہ بیت اگاں ناں گڈا اے مئے ھک انت کہ زھرشانی بہ کن ایں ءُ لاچار بہ ایں کہ سی پیک شھدگ ءَ بند بہ کن ایں –

دومی نیمگ ءَ پاکستان میڈیکل ایسوسی ایشن ءِ جارکش ءِ رِد ءَ پھازگی لشکر ءَ آرتھوپیڈیکس سرجن ڈاکٹر واحد بخش بلوچ ءِ گِس ءَ بیڑ برتگ ءُ زھگ ءُ زالبول ترس ءِ آماچ کتگ انت ءُ چادر ءُ چاردیوالی لگتمال کتگ –

پی ایم اے اشی ءِ بگیری ءَ مروچی زھرشانی ءِ جار جتگ ءُ سرکاری نادراھجاھاں او پی ڈی ءِ بائیکاٹ کتگ –

آئی ءِ کھول ءِ مردماں اھوالکاراں گوں تران کنان ءَ گوشتگ کہ پوجی کارمنداں گِس ءَ بیڑ برتگ ءُ مارا ءُ مئے زھگ جتگ انت ءُ واتر شتگ انت –

آھانی گوشگ ات کہ مئے کھول وڈ وڈا دلسیاہ کنگ بوگ ءَ انت اگاں زمان بلوچ تاں باند ءَ زاھر کنگ نہ بوت گڈا ما زھرشانی کن ایں –