سر بیتگیں ھالانی رد ءَ دو ماہ ءُ نیم ءَ پیش چھبار ءَ چیریں ادارانی دست ءَ گرگ بیتگیں نودربر مروچی ماں روکپتی بلوچستان ءِ بنجاھی شھر زاھدان ءِ مزنیں زندان ءَ اجو بیتگ –
آجو بیتگیں ورنا ءِ پجار بیست ءُ سَے سالی ئین علیرضا رئیسی ءِ نام ءَ زانگ بیتگ کہ آ چھبار شھدربرجاہ ءِ اولی سال ءِ نودربر اِنت –
ھالانی رد ءَ علی رضا رئیسی گوستگیں سال ءِ بیست ءُ ھشت نومبر ءَ ماں چھبار ءَ زھرشانیانی پژدر ءَ دزگیر کنگ بیتگ-
آئی ءِ سر ءَ بھتام بیتگ کہ آئی ءَ زھرشانیانی سروکاری کتگ ءُ چریشی ءَ آئی ءِ ھلاپ ءَ بیڑ برگ بیتگ ءُ آ گرگ بیتگ-
روکپتی بلوچستان ءَ اے دزگیری ءُ بیگواھیانی درچ ھما وھد ءَ بندات بیتگ اَنت اود ءَ چھبار ءَ کسان سالین جنکو ماھو ءِ گون ءَ پولیس ءِ بدکاری ءِ بھتام ءَ پد مھلوک برانز گپتگ ات-
چرے وئیل ءَ پد روکپتی بلوچستان ءِ جتا جتائیں جاھاں یک برانزے بندات بیتگ ات کہ اے برانز ءَ یک کساسے ےَ سَے سد ءُ پنچ مردم گرگ ءُ بندیگ کنگ بیتگ اَنت-
ھمے وڑ ءَ روکپتی بلوچستان ءَ مولوی عبدالمجید مراد زئی ءِ دزگیری ءِ ھلاپ ءَ ھم گوستگیں روچاں زالبولانی نیمگ ءَ روانکے کشگ بیتگ ات-
عبدالمجید مراد زئی گوستگیں ھپتگ ءَ دزگیر کنگ بیتگ ءُ پد ءَ آ مشھد ءَ برگ بیتگ چریشی ء ھلاپ ءَ زاھدان ءُ دگہ جاھاں آئی ءِ دزگیری ءِ ھلاپ ءَ بلوچ زالبولاں زھرشانی روانک کش اتگ ءُ ایانی دستاں بینر ءُ پلے کارڈ بیتگ اَنت آیانی سر ءَ آئی ءِ یل کنگ ءِ درگت ءَ لبز نبشتگ بیتگ اَنت-