شال: سرکاری نوکرانی زھرشانی

بلوچستان ءِ بنجاھی شھر شال ءَ پریس کلب ءِ دیم ءَ پی ڈیم ایم ءِ کارداراں وتی ھکانی ھاتر ءَ زھرشانی کُتگ –

کارداراں ڈپٹی ڈائریکٹر پی ڈی ایم ءِ بگیری ءَ اوگام جتگ ءُ ڈپٹی ڈائریکٹر ءِ مٹ کنگے لوٹ کُتگ – 

آھاں گوشتگ کہ پی ڈی ایم ءِ سامان ڈبل روڈ ءِ دکاناں بھا بوگ ءَ انت – مروچی یک کرپٹ ایں ڈپٹی ڈائریکٹر ءِ بگیری ءَ زھرشانی بوگ ءَ انت – 

آھانی گوشگ ات کہ پی ڈی ایم ءِ ڈپٹی ڈائریکٹر چارمی تبک ءِ نوکراں بیھار دیگ ءَ انت دگرانی دست ءَ جنائینگ ءَ انت اگاں آئی ءِ بگیری ءَ گامگیج زورگ نہ بوت گڈا ترندیں زھرشانی کنگ بیت اِنت – 

کاردارانی گوشگ ات کہ ڈپٹی ڈائریکٹر ءِ ھار آماچیں مردمانی مڈیانی کرپشن ءَ ھم دست مان انت – اگاں آئی ءِ بگیری ءَ گامگیج زورگ نہ بوت گڈا ما ھمے سرپد بہ ایں کہ مزن وزیر ءُ وزیر داخلہ ھم کرپشن ءَ ھوار انت – 

زانگ بہ بیت شال ءِ ریل ءُ کیسکو ءِ کارداراں ھم وتی لوٹانی ھک ءَ زھرشانی کتگ – آھانی گوشگ ات کہ آھانی بنکی لوٹانی سر ءَ گامگیج نہ زورگ سرکار ءِ نادلگوشی یے – 

دومی نیمگ ءَ بلوچستان اسمبلی ءِ ایم پی اے قادر نائل ءِ بگیری ءَ ھم زھرشانی کنگ بوتگ زھرشانی کنان ءَ درنگاز کنوکاں بائی پاس شھدگ سرجمی ءَ بند کتگ – 

درنگاز کنوکانی گوشگ ات کہ  کرپٹ ایں ایم پی اے قادر ناہل جبل نور کبرستان ءَ کیھازی ٹک ءِ زمیناں وتی مردمانی نام ءَ کنگ ءِ جھد ءَ کنگ ءَ انت – کہ اشی ءِ بگیری ءَ دمگی مردماں زھرشانی کتگ ءُ دگ بند کتگ –