روکپتی بلوچستان ءَ سال 2022 ءَ 179 بلوچ پاھو دیگ بیتگ اَنت – بلوچ کمپعن فعالین ءِ رپورٹ

روکپتی بلوچستان ءَ انسانی ھکانی واستا کار کنوکیں گل بلوچ کمپعن فعالین ءِ رد ءَ سال دوھزار ءُ بیست ءُ دو ءَ ایران ءَ پاھو دیگ بیتگین مردمانی تہ ءَ سَے ھکے مردمانی بھر سیستان و بلوچستان ءَ اِنت-

رپورٹ ءَ گوشگ بیتگ کہ اے اود ءَ انسانی ھکانی لگتمالی یکشل ءَ بوگ ءَ اَنت ءُ چرے گوستگیں سال ءَ یک سد ءُ ھپتاد ءُ نُھ بلوچ پاھو ءِ دار ءَ درنجگ بیتگ اَنت-

رپورٹ ءِ رد ءَ پاھو دیگ بیتگیں مردمانی تہ ءَ یک سد ءُ ھبدہ مردم نشہ ءِ باپاری ءِ پژدر ءَ پاھو دیگ بیتگ اَنت ءُ چل ءُ ھشت کوشانی بھتام جنگ ءُ پاھو دیگ بیتگ اَنت-

رپورٹ ءَ گوشگ بیتگ کہ سیستان و بلوچستان ءَ پاھو دیگ بیتگیں مردمانی کساس گیشتر اَنت بلے اے ھما ھال اَنت بلوچ کمپعن ءَ سر بیتگ ءُ آئی ءَ دمگی ءُ سرکاری پھناتاں راست کتگ اَنت-

بلوچ کمپعن فعالین ءِ گوشگ اِنت کہ سیستان ءُ بلوچستان ءَ پاھو دیگ بیتگیں بازیں مردمانی ھال ھمے سبب ءَ چیر تر اَنت کہ اود ءَ آیانی کھولاں ھال نہ بیت یا کہ ترس ءُ بیم ءَ آیانی کھول گپ ءَ کش ات نہ کن اَنت-

زانگ بہ بیت چریشی ءَ پیش ایمنسٹی انٹرنیشنل ءَ ایران ءَ جتا جتا راجانی رنگ ءُ نسل ءُ دینانی پژدر ءَ پاھو دیگ ءَ بند کنگ ءِ بیھار داتگ اَت-

سرجمیں ایران ءِ پاھو دیگ بیتگیں مردمانی کساس شنگ نہ بیتگ اَنت بلے ایرانی انسانی ھکانی گل ءِ رد ءَ گوستگیں سال ءِ یازدہ ماھانی توک ءَ پاھو دیگ بیتگیں مردمانی کساس پنچ سد ءَ گیش اِنت –

ایرانی انسانی ھکانی گل ءِ رد ءَ ایران ءَ زھرشانیانی وھد ءَ گوستگیں چار ماھانی توک ءَ یک سد ءُ نُھ مردم پاھو ءِ دیگ ءِ ترس ھست اِنت ءُ ایشانی توک ءَ چار کس پاھو دیگ بیتگ اَنت-