راجی زُبان ءِ جُھد ءُ بلوچ زالبول
نبشتہ کار: آئیشہ بلوچ
دی بلوچستان پوسٹ
گِند ئے اِمرُوز ءِ دزگٹّی سک باز اَنت، بنی آدم ءَ پہ وتی لاپ ءِ شوھازگ ءَ سک جُھد کنگ لوٹ ایت۔ چہ ھمے اِمرُوز ءِ دذگٹیاں جنیں آدم ءِ دزگٹّی چہ مردین ءَ باز اَنت۔ جنین آدم ءَ لوگ ءِ کار سک باز اَنت۔ ھاس بلوچ چاگِرد ءِ توک ءَ زالبوالاں گُدشُودی، چُلّ ءِ کار ءُ نُنُکانی ھیالداری ءِ وڑ ءَ دِگہ بازیں انچیں کار ھست کہ دزھُورکی ءِ وھد کَشگ سک باز گِران اِنت۔ گُڑا اے وڑیں ھالاتاں بلوچ زالبول پہ وتی راج ءُ راجی زُبان ءَ چے کُت کن اَنت؟-
گِند ئے اِے یک راستیں جُستے کہ منی بازیں دزگْوھارے من ءَ اِے سوال ءَ جُست کنت کہ ما زالبوالاں سک باز کار ھست گُڑا ما چون ءَ وھد دات کن ایں ءُ بلوچی دربر ایں؟ گُڑا من وتی راج ءِ زالبوالاں چیزے نبشتانکی دْروشم ءَ گْوشگ لوٹ آں کہ اے جِست ءِ پسّو نبشتانک ءِ برکت ءَ بلوچ راج ءِ ھر وانِندھیں زالبول ءَ سر بہ بیت۔ گِند ئے پہ زُبان ءَ کار کنگ یک راجی کارے، راج ءِ شھزانت ءُ زُبانزانت واجہ ناگُمان بلوچ گْوش ایت “دانکہ کَسے زُبان دوست مہ بیت آ راجدوست بیت نہ کنت” بزانکہ زُبان دوستی، راجدوستی ءُ وتواجھی ءِ جُنز اے دْراہ وت ماں وت ھمگرنچ اَنت۔ بزاں زُبان دوستی ءُ زُبان ءِ سر ءَ کار کنگ ءُ راج ءِ تہ ءَ راجی زُبان ءِ ارزِشت ءُ بستار ودی کنگ اِے دْراہ راجی آشوب ءِ بھر اَنت ءُ دُنیا ءِ تہ ءَ بے زالبولانی بھر زُورگ ءَ آشوب سوبمند نہ بوتگ اَنت پمیشکا ما گِندگ ءَ ایں کہ پہ بلوچ آشوب ءِ سوبمندی ءَ شھید کریما بلوچ، بیگواھیں زرینہ مری، شھید پوزیا بُگٹی، شھید سرباز شاری بلوچ، بانُک ھُوران، لُمہ یاسمین ءُ بانُک ماھرنگ بلوچ ءِ وڑیں دِگہ بازیں شیرزالانی نام مئے بلوچ آشوب ءِ توک ءَ ھست اَنت۔ بزانکہ بلوچ آشوب ءَ بلوچ زالبولانی رھشُونی ھم ھست، آزات ھیال ءُ راجمستریں بلوچ چاگِرد ءَ ما زالبول گوں وتی مردیناں برابر ایں۔ گْوش اَنت کہ زُبان بَھر ءُ بانگیں راجاں نزیک کار ایت، زُبان مھلوک ءَ راجدوست کنان ءَ یکمُشت کنائین ایت۔ زُبان راج ءِ پجّار اِنت، تھنا ھما راج زِندگ بنت ءُ دیمروی کن اَنت وھدیکہ آ وتی زُبان ءَ وان اَنت ءُ نبشتہ کن اَنت۔ گُڑا بچار ایں کہ ما بے آسراتی ءُ ایردستیں بلوچ راج پہ وتی زُبان ءَ چے کُت کن ایں؟-
گِند ئے اگاں یک بلوچ زالبولے ءَ سمارٹ پون ھست، اگاں وٹس ایپ ءُ پیسبوک ءَ کارمرز کنگ ءَ اِنت گُڑا ما آ زالبولاں اِے وَ نہ گْوش ایں کہ شما وتی لوگ ءِ کاراں یل بکن اِت ءُ دْراھیں روچ بلوچی بِوان اِت یا بوانین اِت۔ بنی آدم ءِ توری ھر وڑیں دزگٹّی یے بیت بلے زُبان دوستی ءِ مارشت آئی ءَ ھر روچ دہ یا بیست دمان ءِ دزھُورکی وَ الم دنت پمیشکا شُما تھنا راجی زُبان ءِ جُھد ءَ ھوار ءُ ساڑی بِہ بَہ اِت اے ھم پہ ما گنج اِنت۔ باید اِنت ما دلپروش مہ بہ ایں کہ مارا پہ وتی راجی زُبان ءِ وانگ ءُ دربرگ ءَ وھد نہ رس ایت۔ اگاں تھنا ھر روچ دہ دمان ھم بہ رس ایت گُڑا ھمے دہ یا پانزدھیں دماناں مُدام بلوچی دَرونت ءُ راجدوستی ءِ نبشتانکاں وانان ءَ وتی راجی زُبان ءِ راست نبیسّگ ءَ ھیل بکن ایں۔
یک وٹس ایپی گلے ءِ باسکانی(مِمبر) گُنجائشت چہ 1000 ءَ گیش اِنت۔ اگاں یک زُبان دوستیں زالبولے بلوچی وٹس ایپی وانگجاھے پچ کنت ءُ وتی دزھُورکی ءِ وھد ءَ بلوچ راج ءِ نودربراں بلوچی بوانین ایت گُڑا بزانکہ آ بلوچی ءِ یک دْراھیں اسکولے وانینگ ءَ اِنت، بزانکہ یک کالجے پچ کُتگ ئِے۔ ایشی ءِ مستریں درور پَسّنی ءِ جھنِندیں بانُک جمائتی بلوچ گوں دزگْوھاران اَنت کہ ھمے بانُک بلوچ راج ءِ نودربراں وٹس ایپی وانگجاہ کہ نام ئِے “کندیل آنلائین ایجوکیشن” اِنت، بلوچاں انگریزی، میڈیکل سائنس، انجینئرنگ(پِزکس، میتھز ءُ کیمسٹری) ءِ سبجیکٹاں ھوار راج ءَ بلوچی ءَ ھم وانینگ ءَ اَنت۔ وش ٹی وی ءِ بانک ءِ جُھدانی سرجمیں ڈیکومنٹری آن ائیر کُتگ۔ ھمے داب اگاں بانُک زھداہ رئیسی، بانُک اندلیب گِچکی، بانُک شازیہ بلوچ، بانُک ھمیدہ بلوچ ءُ بانُک پوزیا بلوچ ءِ وڑ ءَ یک دربُرتگیں گْوھارے تھنا ھر روچ یک بلوچی دَرونت ءُ یک راجدوستی ءِ نبشتانکے ماں وتی وٹس ایپی بلوچی وانگجاہ ءَ راہ بدنت۔ گُڑا نودربر چہ ایشانی وانگ ءَ کم کم ءَ وت ھیل کن اَنت۔ چوناھا مرچی بلوچی زُبان ءِ شریں دَرونت ءُ راجدوستی ءِ نبشتانک ماں شوشل میڈیا ءَ ھم البار(عام) اَنت۔ پمیشکا ما گوں راج ءِ بانُکاں دزبندی کن ایں کہ وت ءَ مُدام ھمے بلوچی وٹس ایپی وانگجاھاں ساڑی بہ کن اِت، بنداتی روچاں بلوچی دَرونت ءُ نبشتانکاں وانان ءَ وتی راجی زُبان ءِ راست نبیسّگ ءَ ھیل بکن اِت، وھدیکہ شُما بلوچی وانگ ءُ راست نبیسّگ دربُرتگ گُڑا دیم ءَ ھرکَس وٹس ایپی وانگجاھاں اڈ کنان ءَ وتی لوگ ءِ مردم ءُ سْیاداں بلوچی بوانین اِت۔ گِند ئے اگاں ما بلوچی راست نبیسّگ ءَ بلد بیتگ ایں گُڑا ما شریں شائِر ءُ جْوانیں نبشتہ کارے جوڑ بہ ایں ءُ مئے راجی زُبان ھم دیمروی کنت-
چوناھا بلوچی وانگ، نبشتہ ءِ دربرگ ءُ وانینگ مئے یک راجی زمہ واری یے۔ گُڑا باید اِنت ما زالبول بلوچی وت بوان ایں ءُ راج ءَ ھم بلوچی وانگ ءُ دربرگ ءِ سکین بدے ایں۔ وھدیکہ ما زالبول پہ بلوچی زُبان ءِ دیمروی ءَ جُھد کُت گُڑا مئے وانِندھیں بْرات ءُ کماش ھم مئے ھمکار ءُ ھمکوپگ بنت ءُ مئے راجی زُبان بلوچی ءُ براھوئی دیمروی کن اَنت۔ما یک رندے پد ءَ گْوش ایں ھچبر اشتاپ مہ بِہ اِت اگاں ما ھر روچ تھنا یک درونتے ھورت بوان ایں یا تھنا وت ھمے وٹس ایپی وانگجاھاں ھوار بہ ایں ءُ مُدام ساڑی بَہ ایں گُڑا اے ھم گنج اِنت، بزاں ما وت کم کم ءَ ھیل کن ایں۔ باید اِنت ما بلوچ راج ءِ وانِندھیں بلوچ آگاہ بِہ بَہ ایں ءُ دُنیا ءِ دِگہ راجانی وڑ ءَ بلوچ راج ءَ ھم اے دامگی(انٹرنٹی) آسراتی پہ وتی زُبان ءِ دیمروی ءَ کارمرز کنگی اَنت۔
بلوچی شالا دیمروی بکنات، بلوچ راج شالا یکمُشت ءُ تپاک بہ بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔