رجانک ئِے بکن اِت!
نبشتہ کار: ابدلستار بُگٹی
دی بلوچستان پوسٹ
لھتیں بلوچ ھِندی، پارسی ءُ انگریزی ءِ نبشتھاں مئے نیمگ ءَ راہ دے اَنت ءُ گْوش اَنت “ایشی ءَ ماں بلوچی ءَ رجانک(ترجمہ) بکن کہ شریں نبشتانکے ءُ راج وان ایت ئِے” بازینے وتی رَد نبشتگیں دْراجیں نبشتانک ءُ آزمانکاں راہ دنت ءُ گْوش ایت “من نبشتانکے نبشتگ منی ءَ راست بکن”-
گُڑا ما اِے وڑیں زُبان دوستیں وانِندھاں سرپدی دیگ لوٹ ایں کہ چوناھا شما وت بلوچ اِت پمیشکا پہ یک وانِندھیں بلوچے بلوچی وانگ ءُ بلوچی ءِ نبشتہ ھیل کنگ سک آسان اِنت گِند ئے ما تھنا اشتاپ مہ بَہ ایں۔ باید اِنت شما اول بلوچی بُنگیجی دَرونتاں بوان اِت کہ آ دَرونت تھنا شش اَنت۔ چہ درونتانی وانگ ءَ پد ءَ شما بلوچی راست نبیسّگ ءُ بُنرھبند ءِ بابت ءَ ھم سرپد بہ اِت پد ءَ اے وڑیں چیزاں شما وت ھم رجانک کُت کن اِت۔۔۔ وت راست ھم نبشتہ کُت کن اِت۔
اول ما رجانک کنگ ءِ بابت ءَ گْوش ایں کہ گِند ئے اگاں ایشی ءَ ما رجانک بکن ایں گُڑا شمارا چے پائدگ رس ایت؟ بلوچی ءِ بُنگیجی دَرونتانی وانگ ءَ پد اول شما وتی کار ءَ، بزانکہ وتی جھد ءَ وت بُنگیج بکن اِت گُڑا پد ءَ ما مُدام شمئے ھمراہ ءُ کُمکّار ایں باید اِنت اول شما وت جُھد بکن اِت ءُ وت رجانک ئِے بکن پد ءَ ما شمئے رجانک کُتگین ءَ الم وان ایں، چار ایں ءُ راست ءُ شر ئِے ھم کن ایں۔ وتی وس ءُ واک ءِ ھساب ءَ ما شمارا رجانکاری ءِ سرپدی ھم دے ایں کہ رجانکاری کُجام ءُ چونیں چیزانی ھیالداری کنگ لوٹ ایت۔ بزاں مارا اول وتی جُھد وت بندات کنگی اِنت کہ ما بلوچی نبیسّگ ءُ رجانکاری ءَ ھیل بہ کن ایں۔ چہ اے وڑیں ھیلکاری ءَ ما راجی زُبان ءِ راست نبیسّگ ءَ ھم زبر بِہ بَہ ایں۔
ھمے پیم ءَ لھتیں سنگت بے دَرونتانی وانگ ءَیکپارگی دْراجیں نبشتانکاں نبیسّ اَنت ءُ پد ءَ مارا گْوش اَنت “منی رَدیاں راست بکن اِت”-
منی واجھاں ردی وَ بنی آدم ءِ دست ءَ بیت بلے مارا چہ وتی رَدیاں دربرگی اِنت۔ گِند ئے ما شُمئے رَدیاں وَ راست کن ایں، ما پہ شُمئے ھزمت ءَ مُدام تیار ایں بلے شُمئے ھم یک زمہ واری یے ھست، باید اِنت شما ھم چہ وتی رَدیاں دربرگ ءِ جُھد بکن اِت ، شما ھم اول بلوچی درونتاں گوں دلگوش ءَ بوان اِت ءُ پد ءَ کم کم نبشتہ بکن اِت۔ باید اِنت یکبرے شما وتی ھر نبشتگیں گالرِداں وت ھم چمشانکے بدے اِت کہ اگاں نبشتہ ءِ توک ءَ ردی یے ھست گُڑا من وت راست ئِے بکن آں۔ چوناھا یک دست ءَ چاپ نہ بیت، داں وھدے کہ تو وت وانگ ءُ دربرگ ءِ جُھد مہ کن ئے گُڑا ترا مُدام کَس نہ وانین ایت۔ اول ترا وت وانگ ءُ راست نبیسّگ ءِ جُھد کنگی اِنت۔ پد ءَ ما ھم شُمئے نبشتانکاں چار ایں ءُ راست اش کن ایں۔ بزانکہ مارا اول بلوچی دَرونت وانگ ءُ پد ءَ بلوچی نبشتہ کنگی اِنت۔ مُدام ھمے ھیل بہ کن ایں کہ وتی نبیس اتگیناں بے وت وانگ، بے چمشانکے دیگ ءُ رَدیانی راست کنگ ءَ وتی کلوہ ءُ نبشتانکاں راہ مہ دے ایں پرچا کہ رَد نبشتگیں نبشتہ بلوچ وانوکاں گیشتر اڑین اَنت، گَڑ ءُ منج کن اَنت چہ ایشی ءَ بلوچی زُبان ءَ پائدگ وَ اِنا بلکیں تاوان رس ایت پمیشکا گوں شما دزبندی اِنت اول دَرونتانی وانگ ءِ جُھد بکن اِت ءُ پد ءَ نبشتہ ھیل بکن اِت۔
پہ راجی زُبان ءِ دیمروی ءَ مُدام جُنزان بات اِت، بلوچی وت بوان اِت ءُ راج ءَ ھم بلوچی وانگ ءُ دربرگ ءِ سکین بدے اِت۔ بلوچی شالا دیمروی بکنات ءُ بلوچ مُدام میزران بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔