نہ گُشتگیں مارشت
نبشتہ کار: مریم عبداللہ
دی بلوچستان پوسٹ
شیھک ءِ لوگ ءَ مدام آئی ءِ سنگت شُت ءُ اتک اَنت بیٹک ءَ نِشت اَنت داں دیر ءَ گپ ءُ تران اش کت۔ دودا آئی ءِ دوستیگیں سنگت اَت ءُ آ پارٹی والا مردمے اَت اے وھد ءَ ھلک ءِ جاور شر اِت اَنت گڑا دودا ھر روچ شیھک ءِ کرّا شُت نند ءُ نیاد ئِے کت شیھک ءِ گوھار شلی چہ کسانی ءَ دودا ءَ گندگ ءَ اَت ھردیں آئی ءِ لوگ ءَ آئی ءِ برات ءِ نیاد ءَ اتک شلی ءَ چیروکائی چار اِت، آئی ءَ وتی اندر ءَ واھگے داشت کہ دودا ھر روچ بئیت ءُ آئی ءَ بگند ایت، آئی ءِ آیاھگ آئی ءِ چارگ آئی ءِ گپ ءُ تران شلی ءَ سک دوست اِت اَنت دودا ءِ دپ ءَ در اتکگیں درْاھیں دانک شپانی پاساں شلی ءِ گوشاں چو وش تواریں سوت ءَ چکرّ اِت اَنت آئی ءِ توار ءَ چے شلی ءَ ساکمی رس ات ءُ وتی اندوھاں چے پراموش بوت۔ بلے آئی ءِ اے واھگ زوت پُروش ایت وھدے ھلک ءِ جاور نگیگ بنت ءُ دودا اے ھلک ءَ یل دنت روت، وھد ھمے وڑ ءَ گوْزان بیت ءُ شلی دودا ءِ یاتانی گوما وتی روچاں چو تھار شپیں کوٹی ءِ تہ ءَ دیم ءَ دِکّہ دیان ءُ گوْازینان بیت۔
مگرب ءِ وھد اَت چُل ءَ چے دوتّانی بوہ گوں سارتیں کوش ءَ ھوار اَت ءُ شلی ءَ تاھیر بکشگ ءَ اَت، شلی بے سبری ءِ گوما وتی برات ءِ ودار ءَ نشتگ اَت کہ کدی آ بئیت ءُ دودا ءِ اکس ءَ گوں وت بیار اِیت، شلی ءَ زِدّ کتگ اَت کہ شیھک وتی سنگت ءِ اکس ءَ پہ یک چمے ءِ چارگ ءَ بیار اِیت اے گپ ءِ سر ءَ شیھک ابکّا بوت کہ “منی سنگت ءِ اکس ءَ تو چے کن ئے؟” بلے شلی ھمے گپ ءِ سر ءَ رازی ئِے کنت کہ آ کسانی ءَ یک جاہ بوتگ اَنت ءُ دیر اِنت نہ دیستگ ئِے۔ تھاری چاریں آتراپاں مان شانگ ءَ اَت، شلی ھیالانی کور چات ءَ کپتگ اَت کہ شیھک ءَ دروازگ پچ کت دروازگ ءِ توار ءَ گوں شلی ھیالاں چے در اَتک۔ شیھک ءَ سالے ءَ پد وتی دوستیگیں سنگت دیستگ اَت ءُ سک گل اَت، آ وتی گوھار ءِ کش ءَ نشت ءُ دودا ءِ کسہ کنگ ءَ لگّ ات؛ “دودا ءَ اے سالے تھا باز اڑ ءُ جنجالانی دیمپانی کتگ ات آئی ءَ درْاھیں راج ءِ زمہ واری وتی نازرکیں کوپگانی سر ءَ کتگ، اے راہ ءَ کہ دودا در کپتگ اِد ءَ آ وتی وشیاں وتی مارشتاں وتی ھمبلاں درْاھیناں بائد اِنت پُشت ءَ یلہ بدنت بس پہ وتی گلزمین ءِ ڈل ءُ ڈوکانی پھّازگ ءِ ھاتر ءَ وتی نوکیں پدریچ ءِ دیم ءَ برگ ءُ مئے وڑیں ھمبل ءُ ھمراھاں آزاتیں زند ءِ بکشگ ءِ ھاتر ءَ وت ءَ زندگ بکنت۔
ما اے چیز ءَ نماریں نجیڑیں بلے اے مئے وشبھتی اِنت مارا چوشیں سنگت رس اتگ کہ وتی شُد، تُن ءُ واباں ءَ چے سر گوستگ اَنت تاکہ ما سِیریں لاپ ءَ وتی شپاں روچ بکنیں، آ وتی ھون ءِ وشبو ءِ گوما کُلیں راج ءَ زندگ دار اَنت بلے ما نہ زانت کاریں کوم وتی سنگتانی کربانی ءَ مان نیاریں، اشانی اے سسّہ ءُ لیکہ مارا دیم ءَ برگ لوٹ اِیت مارا اے دلبڈی دیگ لوٹ اَنت- شیھک ءَ دیمتر ءَ گپ جت نکت بس آئی ءَ وتی دست ءِ موبائل شلی ءِ نیمگ ءَ شھار دات ءُ دودا ءِ اکس ئِے پیش داشت، دمانے ءَ پد آ پاد اتک دومی کوٹی ءَ شُت شلی پدا چُل ءَ شُت نشت، شلی ءَ میزاں میزاں وتی موبائل در کت دودا ءِ اکس ءَ چارگ ءَ لگّت آئی ءَ شیھک ءِ موبائل ءَ چے اکس چیروکائی وتی موبائل ءَ سِنڈ کتگ اَت، دودا ءِ اکس ءَ سمارگ ءَ لگّت انچو سماہ ئِے کت کہ دودا آئی ءِ دیم ءَ نشتگ ءُ آئی ءِ پیشانیگ ءَ دست پر کنگ ءَ اِنت۔ چُلّ ءِ تہ ءَ روکیں آس ءَ چارگ ءَ لگّت ءُ جیڑ اِت ئِے؛ ” زمانگے ءَ پد کہ ترا چہ گستا بوتگاں نوں من ترا چاراں گمان کناں منی لنٹ پہ بچکندے ءَ انچوش تلوستگ اَنت چوشکہ تونّیکیں گلابے پہ آپ ءَ زر ایت، من نزاناں اے چونیں مارشتے منی تہ ءَ چست بوتگ چہ کسانی ءَ تو منی دیم ءَ بوتگ ئے باز وھد ءَ من چیروکائی ھم ترا چار اِتگ بلے انگت دل ءَ گُشتگ گیشتر بچار ئِے تئی توک ءَ گش ئے انچیں جادو ئے بوتگ کہ ھر وھد من ءَ وتی نیمگ ءَ کَشّتگ ئِے-
شلی ھمے شش پنچ ءِ تہ ءَ کپتگ اَت کہ دودا ءَ ھال بدنت یا ناں، وتی نہ گُشتگیں مارشتاں آئی ءِ دیم ءَ درشان بکنت یا ناں بلے آئی ءِ توک ءَ اینچو ھمت ھم نیست اَت بس آئی ءِ اکس ئِے چارت ءُ وت ءَ تاھیرے بکشات، آئی ءِ ھیال ئِے وتی زرد ءِ تھ ءَ کُبل کت اَنت ءُ ھیر کت اَنت۔
ھمے وڑ ءَ روچ گوْزان بوت اَنت شلی ءِ سور بوت ءُ اے ھلک ءَ چے در اتک شُت، سور ءَ پد ھم چہ دودا ءَ پراموش نہ بوت وس کت ئِے آئی ءِ ھیال چہ شلی ءِ سر ءَ در نیتک اَنت، مدتے ءَ پد اناگت ءَ یک روچے دودا ءِ سنگتے ءِ گون ءَ آئی ءِ ھال ءُ اھوال بوت گپ گپ ءِ تہ ءَ آئی ءَ دودا ءِ جست پرس کت گڑا ھال ئِے رس ات “دودا سور کتگ ءُ چکے ھستے”، آئی ءِ ءُ چکانی اکس ءَ ھم پہ شلی ءَ دیم دنت، شلی ءِ سر ءَ گش ئے آزمان کپ ایت آ نہ زانت کجام مارشت ءِ بُنیاد ءَ گمیگ بہ بیت دودا ءَ ھچبر چُشیں کول ءُ کرارے آئی ءِ گون نہ کتگ اَت کہ چہ آئی ءَ گلگدار بہ بیت بلے شلی چہ دل ءَ مجبور اَت، ساھتے رند شلی ءَ وتی ھوش سر ءَ کت بلے دل ئِے داشت نکت ءُ آئی ءَ چے دودا ءِ نمبر ءِ لوٹے زاھر کت۔
شلی ءَ وتی کوٹی ءِ دپ پچ کت شت تھت ءِ سر ءَ نشت وتی موبائل ئِے دست ءَ کت چیٹ ءَ پُترت پہ دودا ءَ میسجے نبشتہ ئِے کت پدا آئی ءِ نمبر ءَ روک روک ءَ چارگ ءَ لگّت ءُ میسج ئِے ڈیلیٹ کت چیٹ ءَ چے در اتک، آئی ءَ موبائل تھت ءِ سر ءَ ھیر کت ءُ شت آندینک ءِ دیم ءَ اوشتات وت ءَ چارگ ءَ لگ ات ءُ گوں وت ءَ جیڑ اِت ئِے؛ “شلی تو چے کنگے؟ تو یک سور کتگیں زالے یے ءُ چکے لاپ ءَ اِنت، دودا ھم سور کتگ گوں وتی جن چکاں وش ءُ وش ھالیں زندے گوْازینگ ءَ اِنت، تو کجام آپ ءُ دپ ءَ اے گپاں گش ئے آئی ءَ؟ اگاں میسج بکن ئے ھم گڑا دودا ترا چے جواب دنت؟ تئی ھیال ءَ دودا تئی مھر ءَ وتی دیدگانی تھا سمبھین اِیت ءُ ترا وتی دل ءَ جاگہ دنت؟ اناں شلی، اے بے سریں گپاں چہ وتی سر ءَ در کن گنوک مبو۔
دو سے روچ ءَ پد ماں پد ھمے وڑ ءَ چیٹ ءَ پُترت بلے دست ئِے دیما نہ کِنز اِت اَنت میسج ئِے نبشتہ کت بلے پدا ڈیلیٹ ئِے کت، جیڑگ ءَ لگّت کہ “وتی مارشتانی جزبگانی زاھر کنگ ءَ ھچ متلب نیست چے نبشتہ بکناں چے بگوشاں کہ من تئی ھودوکاں؟ منی چم ھر وھد تئی دیدار ءِ تلبگار بوتگ اَنت تو منی دل ءَ نشتگ ئے؟” آئی ءَ لوٹ ات نمبر ءِ ڈیلیٹ بکنت بلے دست ءُ دل ئِے نہ شُت اَنت۔ ھمے وڑ ءَ لھتے روچ گوْست شلی وتی دل ءِ توکے چست بوتگیں جیڑہ ءِ گوما جنگ ءَ اَت بلے ھچ جاگہ ءَ سر نہ بوتگ اَت۔ یک روچے بام ءَ ٹک کتگ اَت دریگ ءَ چے روچ ءِ رژن شلی ءِ چماں ناوار کنگ ءَ اَت شلی ءَ بُست کت موبائل ءَ چے نوٹیفکیشن ءِ توار چست بوت شلی ءَ موبائل چست کت چاران بوت اناگت ءَ پوسٹے آئی ءِ دیم ءَ گوْست آئی ءَ وتی چمانی سر ءَ بیسہ نبوت پدا شری ءَ چارگ ءَ لگّت ءُ ونت ئِے ‘دودا گوں سنگتے ءَ شھید کنگ بوتگ’، اے گپ چو سوچّن ءَ آئی ءِ سر ءَ ٹُنگ کنگ ءَ لگّ اِت انچیں دردے آئی ءِ سر ءَ چست بوت گش ئے کوھے آئی ءِ سر ءَ کپت ءُ ٹُکّر ٹُکّر بوت آ وتی اوشتاتگیں جاگہ ءَ ھُشک ءُ ھیران بوت اے دمان ءَ آئی ءَ وتی کش ءُ کِرّ ءِ درْاھیں مردم وتی جند ھم شموشت بس یکیں دودا آئی ءظ دیم ءَ اَت ءُ پدا ھمے جیڑ اِت ئِے “دْریگتیں دودا ءَ وتی دیوانگ ءِ دل ءِ اندر ءِ گپتار ءُ گال بہ پھمتین اَنت گڑا اے مھر ءَ من ءَ چو گنھگارے ئے پیم ءَ ھر دمان اذیت ءِ توکا دؤر نہ داتگ اَت” ھمدا چے شلی ءَ دودا ءِ نمبر ڈیلیٹ کت ءُ وتی نہ گُشتگیں مارشت ئِے گُٹ گیر کت اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔