گوادر: 144 دفعہ یک ماھے ءِ واستا جنگ بیتگ، روانک، نندانک ءُ مچیانی سر ءَ بندش جنگ بیتگ اَنت

بلوچستان ءِ سرکار ءَ تیابدپی شھر گوادر ءَ یک ماھے ءِ واستا دفعہ 144 جنگ بیتگ – مھکمہ داکلہ بلوچستان ءِ رد ءَ گوادر ءَ یک ماھے ءِ واستا دفعہ 144 جنگ بیتگ-

اُستانی مھکمہ ءِ داکلہ رد ءَ یک ماھے ءِ داں گوادر ءَ روانک، نندانک ءُ پنچ ءَ چہ گیش مردمانی مُچ بوگ ءِ سر ءَ بندش جنگ بیتگ –

مھکمہ ءِ داکلہ بلوچستان ءِ گوشگ اِنت کہ گوادر ءَ سلاہ ءِ بڈ ءَ کنگ ءِ سر ءَ بندش جنگ بیتگ اَنت-

زانگ بہ بیت گوادر ءَ ھمے ھپتگ ءَ حق دو تحریک ءِ نندانک ءِ سر ءَ پوج ءَ کریک ڈاؤن ءِ ھلاپ ءَ ھواریں زھرشانی کنوکاں سرجمیں شھر اش بند کتگ – چریشی ءِ پژدر ءَ سرکار ءَ زھرشانی کنوکانی شنگ ءُ شانگ کنگ ءِ واستا تیرگواری، شیلنگ ءُ دزگیری کتگ اَنت-

مروچی شھر ءَ زند ءِ جاور نابروبری ءِ ھساب ءَ پچ بیتگ اَنت بلے داں انگت ءَ ترس ءِ جاور ھست اَنت ءُ حق دو تحریک ءِ سدانی کچ ءَ باسک دزگیر کنگ بیتگ اَنت-