جیڑہ: راجدوستی ءُ زُبان دوستی – شازیہ بلوچ

جیڑہ: راجدوستی ءُ زُبان دوستی

نبشتہ کار : شازیہ بلوچ

اولی بھر

دی بلوچستان پوسٹ

رُکسار بلوچ : Chonay? Che hal o ahwal ent? Tau mana vati Whatsappi vanagjah avar bekan.

شازیہ بلوچ : دزگْوھار دْروت ءُ دْراہ بات ئے۔ ھو، من ترا ھوار کن آں بلے تو بہ گْوش کہ بلوچی ءَ گوں بلوچی آباں چے ءَ نبشتہ نہ کن ئے؟-

رُکسار بلوچ : من گوں بلوچی آباں نبیسّگ ءَ ھیل نہ آں ءُ بلوچی وَ سک گِران اِنت پمیشکا من جُھد ھم نہ کُتگ۔

شازیہ بلوچ: تئی وڑ ءَ پیسر ءَ ما ھم بلوچی نبشتہ ھیل نہ اِت ایں، بلے یک سرپدی یے بہ دئے کہ بلوچی چتور گِران اِنت وھدے کہ تو جُھد ھم نہ کُتگ؟ انچوشکہ تو وت گْوشگ ءَ ئے کہ تو پہ بلوچی دربرگ ءَ انگت جُھد ھم نہ کُتگ گُڑا چتور بلوچی گِران اِنت؟-

رُکسار بلوچ: اِنّا، من بلوچی وانگ ءَ زبر آں ءُ من ونت ئِے ھم کن آں بلے بلوچی نبشتہ کنگ گِران اِنت ءُ نبیسّگ ءِ وھد ءَ منی دست ءَ سک باز ردی بیت، من وانگجاہ ءَ بلوچی نہ ونتگ پمیشکا شر نبیسّگ نہ زان آں۔

شازیہ بلوچ : ما ھچ کَس ءَ ماں وانگجاھاں بلوچی نہ ونتگ ءُ ناں کہ ما بلوچاں ماں وانگجاھاں مئے جِند ءِ راجی زُبان وانینگ بیت ما زیردستیں راج وتی راجی زُبان ءَ وتی دزھُورکی ءِ وھد ءَ وت وانگ ءُ دربرگ ءَ ایں۔ شمئے ڈول ءَ ما ھم پیش ءَ راجی زُبان ءِ وانگ ءُ نبشتہ نزور اِت ایں بلے ما وتی جُھد برجاہ داشتگ ءُ وتی راجی زُبان دربُرتگ۔ زاناں ترا کَے گْوش ایت کہ تو یکپارگی نبیسّگ ءَ بندات بہ کن ئے؟ البت اگاں کسے بلوچی وانگ ءَ ھیل نہ اِنت گُڑا کم کم ءَ بلوچی درونتاں بِوان ایت ءُ بلوچی وانگ ءَ ھیل بہ کنت وھدیکہ کہ تو بلوچی درونت سرجمی ءَ ونتگ اَنت گُڑا تو بلوچی نبشتانک ءُ آزمانکاں بہ وان ئے پد ءَ کم کم ءَ وت نبشتہ ھیل کن ئے۔ باید اِنت تو نبیسّگ ءِ وھد ءَ اشتاپ مہ بَہ ئے بلکیں ھر وڑیں گالرِدے نبیسّ ئے گُڑا ھمے گالرِد ءَ دو سے رَند ءَ وت چمشانک دیان ءَ راست بہ کن، بلے تو انگت ءَ ھال نہ کُتگ کہ تو چُنت روچ ءُ ماہ ءَ بلوچی درونت ونتگ ءُ انگت ءَ پہ وتی جِند ءِ ماتی زُبان ءِ نبشتہ سْیاھگ ءِ دربرگ ءَ بے سوب بوتگ ئے؟ دومی جُست ایشی اِنت گُڑا تو زان ئے ما چے ءَ مُدام بلوچی ءَ گوں بلوچی آباں نبشتہ بہ کن ایں، بزاں راجی زُبان ءِ نبیسّگ ءِ وھد ءَ انگریزی ءِ آباں کارمرز مہ کن ایں؟-

رُکسار بلوچ: اِنّا من بلوچی دَرونت وت انگت نہ ونتگ اَنت ءُ ناں کہ من درونتانی وانگ بِندات کُت، تھنا بلوچی آزمانک ءُ نبشتانکاں وانگ ءَ آں بلے انگت شر نبشتہ نہ زان آں۔ دومی من چو ھم نہ زان آں بزاں ھاسیں سرپدی نیست اِنت کہ چی ءَ بلوچی گوں انگریزی آباں نبیسّگ مہ بیت!-

شازیہ بلوچ: اولی گپ ایش انت اگاں تو دَرونت ءِ جِند نہ ونتگ اَنت گُڑا تو چے ھساب ءَ گْوش ئے بلوچی گِران اِنت؟ تو ھشت سال پہ ھندی ءِ دربرگ ءَ ءُ دہ یا دوازدہ سال پہ انگریزی ءِ وانگ ءُ دربرگ ءَ دات بلے تو انگت شر انگریزی ھم نبشتہ کُت نہ کن ئے پد ءَ ھم گْوش ئے کہ بلوچی گِران اِنت؟ دومی تو گْوشگ ءَ اِت ئے کہ منی دست ءَ ردی بیت، بلے منی دزگْوھار زاناں تو وانگجاہ ءِ چکاساں ردی نہ کُت؟ زاناں ما پِرشتگ ایں کہ ما ردی مہ کن ایں؟ ردی وَ بنی آدم ءِ دست ءَ بیت۔ باید انت ما چہ ردیاں مہ تُرس ایں بلکیں چہ وتی ردیاں دربر ایں۔ دومی من ترا گوں بلوچی آباں نبیسّگ ءِ سرپدی ءَ بہ دے آں کہ اگاں ما وتی راجی زُبان ءَ گوں وتی جِند ءِ آباں نبیسّ ایں گُڑا ما کم کم ءَ بلوچی نبشتہ ءُ سْیاھگ ءَ ھیل ھم گر ایں۔ ما یک دومی ءِ ردیاں راست کنان ءَ وت ماں وت ءَ وانین ایں، وتی راجی زُبان ءِ نبشتہ ھم زبر بہ ایں چی ءَ کہ گوں انگریزی آباں بلوچی نبیسّگ یا گپ ءُ رپ وھد ءِ زیانی اِنت پمیشکا باید انت ما چاگِردی رسانکدر ءِ گپ ءُ رپ ءَ ھم گوں وتی شھدیں بلوچی ءَ بہ کن ایں چریشی ءَ مئے زّبان ءَ ھم دیمروی رس ایت ءُ دزھُورکی ءِ ھر ساھت ءُ دمان شِریں وڑے ءَ کارمرز بیت۔

روان اِنت—

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔