تربت ءَ دگہ چار ورناہ زورانسری آوار جنگ ءَ پد بیگواہ کنگ بیتگ اَنت

چہ تربت ءَ پاکستانی پوج ءَ بیڑبرتگ ءُ ھمے میان ءَ چار ورناہ زورانسری آوار جنگ ءَ پد بیگواہ کتگ اَنت-

دمگی اِھوالکارانی رِد ءَ گوستگیں شپ ءَ پاکستانی پوج ءَ تربت ءِ دمگ گوکدان ءِ جتاجتائیں لوگاں بیڑبرتگ ءُ چار ورناہ زورانسری آوار جتگ اَنت کھول ءَ اے گپ راست کتگ اَنت-

آوار جنگ بیتگیں ورناھانی پجّار مرزا ء برکت، بلال ء حاجی عبدالعزیز ، عبدالرازق ء محمد جان ءُ محمد حنیف ء غلام جان نام ءَ چہ زانگ بیتگ اَنت وھدے کہ چہ گوکدان ءَ محمد حنیف دادو نامیں ورنایے پیسر ءَ چہ بیگواہ ءَ اِنت-

دو روچ ءَ ساری تربت ءِ دمگ آبسر ءَ چہ یعقوب میتگ ءَ سے ورناہ سید جان ، شھزاد ءُ جھانزیب زورانسری آوار جتگ ءُ بیگواہ کتگ اَنت کہ آیانی درگت ءَ ھچ وڑیں ھال نیست –

اشی ءَ ساری گوکدان ءَ شمبے ءِ بیگاہ ءَ سرجمیں دکان ءُ پیٹرول پمپ پوج ءَ زورانسری بند کتگ اِت اَنت- چریشی ءِ سبب ءَ باپاری مردم دلسیاھی ءِ دیمپان کنگ کپتگ اِت وھدے کہ دمگاں توژگ کمی ودی بیتگ-

دکاندارانی رِد ءَ شمبے ءِ بیگاہ ءَ پوج ءِ کارندہ دکاندارانی سر ءَ لٹ ءُ کُٹ کتگ ءُ پٹرول پمپ بند کنائنتگ اَنت- چریشی ءِ سبب ءَ مارا لکّانی ھساب ءَ رس ا تگ ءُ میڈیکل اسٹورانی بند بوگ ءَ چہ نادُراھانی دلسیاھی گیش بیتگ اَنت –

دمگی مردمانی رِد ءَ اے روچ ءَ پوج ءِ سر ءَ بیتگیں اُرش ءَ پد پوج ءِ مزنیں کچے ءَ میتگ انگر ءَ کتگ ءُ مردماں لَٹ ءُ کُٹ کتگ اَنت ءُ باپار بند کنائنتگ-

اشی ءَ پد پوج ءُ دمگ مردمانی گنند ءُ نند ءَ پوج ءَ دکانانی پچ کنگ ءِ موکل داتگ بلے لھتے دکان انگت بند اِنت کہ آیاں پچ کنگ ءَ موکل دیگ ءَ نہ اِنت –

اے وئیل پوج سر ءَ یک مزنیں اُرشے ءَ پد دیم ءَ اَتکگ کہ اود ءَ گوکدان ءَ بلوچ لبریشن آرمی ءِ یک اُرشے ءَ کم چہ کم ھپت کارندہ مرتگ ءُ ٹپی بیتگ اَنت-

اشی ءَ اَبید کیچ ءِ دمگ تجابان ءَ ھم پوج ءِ بگیری ءَ دمگی مردماں زھرشانی کتگ- زھرشانی کنوکانی گْوشگ اِنت کہ سلاہ بندیں مردمان پوج ءِ پانگس نشانگ کتگ ءُ چریشی ءِ پُشدر ءَ پوج ءَ لَس مھلوک سر ءَ مارٹر آس داتگ ءُ سک تیرگواری کتگ، تیرگواری ءِ نشانگ ءَ اَتکگیں یک زالبولے ٹپی بیتگ-

دمگی مردماں پوج ءِ دراھگ ءِ لوٹ کتگ وھدے کہ دمگ ءَ اشی ءَ ساری ھم ھمے وڑیں وئیل دیم ءَ اَتکگ اَنت-

گوستگیں روچ ءَ تجابان زھرشانی کنوکانی ءُ دمگی انتزامیہ ءِ میان ءَ مھاد ءَ کنگ بیتگ چاردہ روچ ءِ تہ ءَ فرنٹیئر کور بُنجل ءَ دگہ جاھے بر ایں-