روکپتی بلوچستان ءِ بنجاھی شھر زاھدان ءَ دادگاہ ءِ زاھدان ءَ بلوچ جنکے ءَ چار سال ءِ سزا ءِ ھکم داتگ-
سزا دیگ بیتگیں جنک ءِ پجار بیست سالی ئیں ھدیہ ستودہ ءِ امیر ارسلان جھمنند زاھدان ءِ نام ءَ زانگ بیتگ-
ھدیہ بیست ءُ دو ستمبر ءَ زھرشانی ءِ وھد ءَ دزگیر کنگ بیتگ ءُ یازدہ اکتوبر ءَ زمانت ءِ سر ءَ یل کنگ بیتگ –
سر بیتگیں ھالانی تہ ءَ گوشگ بیتگ کہ آئی ءِ سر ءَ زھرشانی پرکینگ ءُ ڈیھ ءِ ھلاپ ءَ مردمانی برانز دیگ ءِ بھتام ھوار اَنت-
زانگ بہ بیت شانزدہ ستمبر ءَ بلوچ جنک ماھو ءِ گون ءَ چھبار ءِ پولیس آپیسر ابراھیم کوچکزئی ءِ دست ءَ آئی ءِ گیرت ءِ سر ءَ اُرش کنگ ءِ ھلاپ ءَ روکپتی بلوچستان ءَ یک برانزے چست بیتگ اَت کہ چرے برانز ءَ بازیں کچے ءَ مردماں زھرشانی کتگ اَت-
زھرشانی پژدر ءَ ایرانی پولیس ءُ دگہ ادارھاں بازیں کچے ءَ زھرشانی ءَ ھواریں مردم دزگیر ءُ جتگ ات اَنت ءُ ھمے میان ءَ سی ستمبر ءَ زاھدان ءَ یک ھون ریچی ءِ ھم کنگ بیتگ ات کہ چرے ھون ریچی ءَ سد ءِ کچ ءَ مردم بیران ءُ سَے سد ءِ کچ ءَ مردم زدگ بیتگ ات اَنت-