تربت ءُ تجابان ءَ پاکستانی پوج ءِ سر ءَ اُرش اُرشانی زمّہ واری بی ایل اے ءَ منّ اِتگ انت

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں کیچ ءِ دمگ تجابان ءُ تربت ءَ پاکستانی پوج ءِ سر ءَ اُرش کُتگ –

اھوالکار ءِ گوستگیں شپ ءَ سلاہ بندیں مردماں یک اُرش ءِ تجابان ءِ دمگ کرکی ءَ سی پیک پھازگی پانگِسے ءِ سر ءَ کُتگ کہ اُرش ءِ آسر ءَ پاکستانی پوج ءَ جانی تاوان ءِ دیمپانی کنگ کپتگ –

اھوالکار ءِ رِد ءَ تجابان ءَ پوج ءِ سر ءَ بوتگیں اُرش ءَ پد پاکستانی پوج ءَ لس مھلوک ءِ سر ءَ کورکاؤ تیرگواری کُتگ ءُ مارٹر گولہ آس داتگ، پوج ءِ تیرگواری ءَ چہ بلوچ زالبول ءِ پاد ءَ تیر ءِ لگ اِتگ ءُ زدگ بوتگ وھدیکہ مردمانی گِساں ھم تاوان بوتگ – پوج ءِ پہ دیم لس مھلوک ءِ سر ءَ تیرگواری ءُ مارٹر گولہ آس دیگ بگیری ءَ مروچی سھب ءَ دمگی مردماں زھرشانی کُتگ ءُ سی پیک شھدگ بند کُتگ –

دومی نیمگ ءَ گوستگیں شپ ءَ کیچ ءِ بنجاھی شھر تربت ءَ ھم ناشناسیں مردماں پاکستانی پوج ءِ پانگِس ءِ سر ءَ دزبمب ءِ چگل داتگ ءُ در شتگ انت ـ چریشی ءَ پاکستانی پوج ءَ جانی تاوان ءِ دیمپانی کنگ کپتگ – دوشی شپ ءَ بوتگیں ھردو اُرشانی زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ انت –

بی ایل اے ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بی ایل اے ءِ سرمچاراں گوستگیں شپ ءَ ادار ھشت ءِ نزیک ءَ تجابان ءِ دمگ کرکی ءَ سی پیک دگ ءِ پھازگ ءِ ھاتر ءَ برجاھیں پوجی پانگسے ءِ سر ءَ نوکتریں سلاھاں گوں اُرش کُتگ – اُرش ءِ آسر ءَ یک کارمندے ھما دمان ءَ مرتگ ءُ سَے زدگ بوتگ انت –

جارکش ءَ گوشتگ اُرش ءَ پد ترسوکیں بزدلیں دژمن ءَ لس مردمانی سر ءَ بازیں مارٹر گولہ ءِ آس داتگ ءُ تیرگواری کتگ – آئی ءَ گوشتگ کہ گوستگیں روچ ءَ مئے یک دگہ سوبمندیں اُرشے ءَ پد زورگیریں پوج ءَ کش ءُ گور ءِ دکان بند کُتگ ءُ تاوان داتگ انت –

جارکش جیئند بلوچ ءَ وتی درشان ءِ تہ ءَ دیمتر ءَ گوشتگ کہ گوستگیں شپ ءَ مئے سرمچاراں تربت بازار ءَ تالیمی چار راہ ءِ سر ءَ برجاھیں پانگِس ءِ سر ءَ ھم دزبمب اُرش ءِ کُتگ چریشی ءَ دو کارمند زدگ بوتگ انت –

جارکش جیئند بلوچ ءَ گوشتگ بلوچ لبریشن آرمی ھردو اُرشانی زمہ واری منّیت ءُ مئے اُرش زورگیریں پوج ءِ سرجمی ءَ درآیگ ءَ تاں برجاہ مان انت –