گوکدان ءَ راج پوج ءِ انگر ءَ انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانگجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار نُھ سد ءُ دو روچ سرجم بوتگ انت –

مروچی بلوچستان ءِ دمگ ھزدار ءَ سیاسی ءُ چاگردی باسک محمد علی بلوچ، عبدالرزاق بلوچ ءُ دگہ مردماں بنجل ءَ اتکگ ءُ دلپدردی درشان اِتگ –

گل ءِ کمک سرکماش ماما قدیر بلوچ ءَ گوشتگ کہ انسانی ھک ءُ زورانسری آوار جنیانی ھاتر ءَ چست بوؤکیں راجی توار ءِ ایرموش کنگ ءَ زلم ءُ زوراکی ءِ ھنچیں درچ ءِ بندات کنگ بوتگ ءُ آئی ءِ تہ ءَ گیشی آرگ بوتگ کہ یزیدیانی کارے نہ انت –

آئی ءَ گوشتگ کہ پنجگور، ھاران، کلات ءُ بولان ءَ ھوار ھوار نومبر ءِ بندات ءَ بگر تاں مروچی ڈیرہ بگٹی، ھرنائی بلوچستان ءِ بازیں دمگ ءِ پوجی زوراکیانی آماچ انت –

ماما قدیر بلوچ ءَ گوشتگ کہ دومی نیمگ ءَ کلات، سوراب، نال ءُ گریشہ ھزدار ءَ چیریں ادارھانی جوڈ کرتگیں کُشندہ ٹولیانی کارندہ دمگ ءِ مردمانی سر ءَ زوراکی ءِ کوہ پروشگ انت – زورانسری آوار جنی ءُ ژانگولیں جونانی چگل دیگ درچ یکشل ءَ برجاہ انت – وھدیکہ نال گریشہ ءَ ھم کشندہ ٹولیانی ناشرکاری برجاہ انت – پاکستان ءِ پوجی ادارھانی زوراکیانی چیردیگ بے سوبیں جھد کنگ بوتگ راستی ءَ چیریں ادارھانی اے ٹولی بلوچ راج ءَ بیھار ءِ کلوہ دیگ لوٹ انت جونانی دز کپگے کار برجاہ انت –

آئی ءَ گوشتگ کہ تربت ءِ دمگ گوکدان ءَ بلوچ راج پھازگی لشکر ءِ انگر انت –