تجابان ءَ پوج ءِ تیرگواری ءَ زالبول ٹپی بیتگ، مردماں زھرشانی کنان ءَ سی پیک دگ بند کتگ

کیچ ءِ دمگ تجابان ءَ پاکستانی پوج ءِ تیرگواری ءَ چہ یک زالبولے ٹپی بیتگ چریشی ءَ پد دمگ مردماں زھرشانی کناناں سی پیک دگ بند کتگ ءُ نندانک جتگ-

دمگی اِھوالکاراں ٹی بی پی ءِ وئیل گیشیں ھال گوشتگ اَنت کہ گوستگیں شپ ءَ تجابان ءَ سلاہ بندیں مردماں پاکستانی پوج چیک پوسٹ سر ءَ اُرش کتگ چریشی ءَ پد پوج ءَ لَس مھلوک سر ءَ تیرگواری کتگ وھدے کہ بازیں مارٹرے آس داتگ-

پوج ءِ تیرگواری ءِ نشانگ ءَ اَتکگیں زالبول ءِ پاد ءَ لگتگ وھدے کہ تیرگواری ءَ چہ بازیں لوگاں تاوان رس اِتگ گیشیں جانی تاوانانی ھال نیست-

دمگی مردماں زھرشانی کنان ءَ سی پیک دگ مروچی سھب ءَ بند کتگ – زھرشانی ءَ زالبول ءُ چُک ھوار اَنت-

اشی ءَ ساری ھمے سال ءِ مئی ءَ ھم دمگ مردماں شھدگ سر ءَ زھرشانی کنانی پوج ءَ را میتگاں چہ درکنگ ءِ لوٹ کتگ- اے زھرشانی ھم پوج ءِ نیمگ ءَ چہ میتگانی سر ءَ مارٹر آس دیگ ءَ پد کنگ بیتگ-

گوستگیں روچ ءَ بلوچستان ءِ جتاجتائیں دمگاں پاکستانی پوج سر ءَ بمب اُرشاں سلاہ بندیں اُرشاں دہ گیش وئیل نکش بیتگ اَنت- گُڈی ھالاں تجابان ءَ پوج سر ءَ سلاہ بنداں اُرش کتگ اشی ءَ ساری تربت شھر جوسک ءِ ھند ءَ پوج دستی بمب ءَ گوں نشانگ کتگ-

اے بیتگیں اُرشانی زمہ واری گیشتر بلوچ لبریشن آرمی ءَ منّ اِتگ اَنت- بی ایل اے جارکش جئیند بلوچ ءَ گوستگیں شپ ءَ شنگ کتگیں درشان ءِ تہ ءَ تربت ، کاھان ، گوادر ، ھب، ھُزدار ، کلات ءُ شال ءَ بازیں اُرشاں پاکستانی پوج ءِ دو آپیسراں ھوار بیست ءُ ھشت کارندہ کشتگ-