بلوچستان ءَ دو جتاجتائیں وئیلاں دو مردم بیران بیتگ اَنت

بلوچستان ءِ دمگ کیچ ءُ لسبیلہ ءَ یکے ءَ وتکشی کتگ ءُ یکے ءِ لاش دزکپتگ-

سربوتگیں ھالانی رِد ءَ کیچ ءِ تھسیل تمپ ءِ دمگ کورجو ءَ لاشے دزکپتگ، دزکپتگیں لاش ءِ پجّار اللہ داد پنّام ءِ واجو ء محمد جان جھمنند آسیا آباد نام ءَ چہ بیتگ-

وئیل سوب انگت زانگ نہ بیتگ-

دومی نیمگ ءَ سرجمیں بلوچستان ءَ وتکشی ءِ دْرچ یکشلہ برجاہ ءَ اِنت ھمے ھپتگ ءَ یک جنکے ءَ ھوار دو مردم وتکشی ءِ رپورٹ نکش بیتگ اَنت-

یکشمبے ءِ روچ ءَ لسبیلہ پولیس ءِ ھیڈ کانسٹیبل رحمت اللہ ء غلام محمد جھمنند بگھیاڑی ءَ گُٹ ءَ ساد مان کتگ دْرچک ءَ چہ درتکگ ءُ وتکشی کتگ-

اشی ءَ ساری کیچ ءَ چہ سیادی داروکیں یک جنکے ءَ ھم وتکشی کتگ اَت-

یکشمبے ءِ روچ لسبیلہ ءَ بیتگیں وئیل درگت ءَ چہ پولیس ءِ گْوشگ اِنت کہ لاش دزگرگ ءَ پد چار ءُ ٹپاس کتگ ءُ لاش کھول ءَ داتگ-

پولیس گْوشگ اِنت کہ وئیل سبب ءِ زانگ ءِ جُھد ءَ اِنت بلے انگت سبب زانگ نہ بیتگ-

سرجمیں بلوچستان دو سالانی تہ ءَ وتکشی وئیل یک تُرسناکیں دروشمے ءَ دیم ءَ آھگ ءَ اِنت، دی بلوچستان پوسٹ نیمگ ءَ چہ یکجاہ کتگیں کچ ءُ کساس رِد ءَ ھمے سال ءَ پنجاہ کیس ءَ سر بیتگ اَنت-

یات بہ بیت کہ بلوچستان ءَ وتکشی ءِ وئیل کجام ھما لوگ ءُ ھند ءَ بیت، گُڑا آئی ءَ چیر دیگ ءِ جُھد ءَ کن اَنت پرچاکہ مردم اشی ءَ وتی بدنامی سرپد بنت-

دی بلوچستان پوسٹ نیمگ ءَ یکجاہ کتگیں کچ ءُ کساس درگت ءَ جتاجتائیں اھولکاراں یکجاہ کتگ اَنت، اے بیتگیں وئیلانی کچ گیشتر بنت-