بولان ءَ بدتریں پوجی زوراکی برجاہ ءَ اَنت- ماما قدیر

بلوچستان ءِ بُنجاھی شھر شال پریس کلب ءِ دیم ءَ وائس فار بلوچ مسنگ پرسنز ءِ زورانسری آوار جنی ءِ بگیری ءَ زھرشانی ئیں بُنجل ءَ مروچی 4812 روچ سرجم بیتگ-

مروچی بلوچ وومن فورم ءِ بُنجاھی راھشون سلطانہ بلوچ، شاہ بی بی بلوچ ءُ دگہ بُنجل ءَ اَتکگ ءُ درشان کتگ-

گل ءِ وائس چیئرمین ماما قدیر بلوچ ءَ گْوشتگ کہ پوج بے میاریں بلوچاں زورانسری آوار جنگ ءَ پد آزارجاھاں ازیت دے اَنت شھید کن اَنت ءُ دور اِش دے اَنت، زورگریں تاکت بے ھد ھونوار جوڑ بوگ ءَ اَنت آ بلوچ راج ءَ ھلاس کنگ ءِ ھاتر ءَ زمین ءِ زورگری ءِ ھاتر ءَ کُشتکشار کنگ ءَ اِنت-

آئی ءَ گْوشتگ کہ گوستگیں ھپتاد دو سالاں بگر تاں مروچی پاکستانی پوج بلوچ ورناہ، مات ، گْوھار ءُ کماشاں بے دردی ءَ جنگ ءَ اِنت-

ماما قدیر بلوچ ءَ گْوشتگ کہ گوستگیں یک ھپتگے ءَ چہ بولان ءَ بدتریں ھونریچی لشکر کشی بوگ ءَ اَنت – بازیں مردمانی شھیدی ءِ ھال اِنت ءُ ھمے وڑ زالبول ءُ شیرواریں چُک انگت پاکستانی پوج ءِ بندیگ ءَ اَنت-