بولان لشکر کشی ءَ ھشت روچیں برجاہ ءَ اِنت، زالبول ءُ چُک انگت بندیگ اَنت

بلوچستان ءِ دمگ بولان ءَ مروچی ھشتمی روچ ءَ ھم لشکر کشی برجاہ ءَ اِنت کہ اود ءَ پوج ءَ جتاجتائیں دمگاں ھداروکی ئیں بُنجل جوڑ کتگ وھدے کہ چُک ءُ زالبول انگت بندیگ اَنت-

اِھوالکارانی رِد ءَ کٹ، کمبانی، سورانی ءُ کش ءُ گوراں پاکستانی پوج ءَ ھداروکی ئیں بُنجل جوڑ کتگ وھدے کہ دمگ ءَ روگ آھگی راہ ءُ در بند کتگ اَنت- دومی نیمگ ءَ زالبول ءُ چُک پوج ءِ بندیگ ءَ اَنت-

دو روچ ءَ ساری سانگان نزیک ءَ سفری ءِ ھند ءَ محمد غوث ء افضل خان مری ءِ لاش دزکپتگ کہ آ 2021 ءَ آوار جنگ ءَ پد بیگواہ کتگ اَت، اشی ءَ پد سے ماہ ءَ بیگواہ کنگ ءَ پد ءَ یل کتگ- انّی بولان ءَ برجاھیں لشکر کشی ءِ وھد ءَ کُشتگ-

گوستگیں روچ ءَ پاکستانی پوج بنشون آئی ایس پی آر ءَ دمگ ھَ لشکر کشی راست کتگ ءُ گْوشتگ کہ سلاہ بندیں میڑ ءَ دو ایس ایس جی کمانڈوز مرتگ اَنت- آئی ایس پی آر ءَ چار بلوچ آجوئی لوٹوکانی جنگ ءِ ٹاہ جتگ بلے تنی وھدے دگہ رسانکدر ءَ اے گپ راست کنگ نہ بیتگ-

اشی ءَ پد بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ میڑاں پاکستانی پوج ءِ ھشت ایس ایس جی کمانڈوز جتگ –

لشکر کشی ءَ زالبول ءُ چُکاں بندیگ کنگ ءَ ھکومت ءُ پاکستانی پوج تُرندیں ایر جنی ءِ دیمپانی اِنت- چاگردی رسانکدر ءَ بولان لشکر کشی ءُ زالبول ءُ چکانی آوار جنی ءِ بگیری ءَ یک کمپئینے برجم دارگ بوگ ءَ اِنت وھدے کہ سیاسی ءُ چاگردی گلانی نیمگ ءَ ایرجنی درشان دیگ بوگ ءَ اِنت-