جی سیون ءِ ڈیھاں ایران ءَ بیوکیں زھرشانیانی ھلاپ ءَ کریک ڈاؤن ایر جتگ

جی سیون ڈیھانی وزرائے ھارجہ ءَ ایرانی سرکار ءِ نیمگ ءَ زھرشانی کنوکانی ھلاپ ءَ کریک ڈاؤن ایر جتگ ءُ ھمے وڑ ءَ روکپتی بلوچستان ءِ عالم دین مولانا عبدالحمید بلوچ ءَ ریفرنڈم کنگ ءِ لوٹ کتگ-

عرب نیوز ءِ رد ءَ آدینگ ءِ روچ ءَ جرمنی ءَ بیوکیں نیاد ءَ پد ھمگرنچیں درشان ءَ جی سیون ءِ وزرایاں گشتگ کہ ما ایرانی سرکار ءِ نیمگ ءَ پرایمنیں زھرشانی ھلاپ ءَ ناروائیں زالمیاں تاکت ءِ زور ءَ کارمرد کنگ ءَ ایر جن ایں-

آیاں گوشتگ کہ ما ایرانیانی ھکانی رسگ ءِ لوٹ ءَ کن ایں ءُ ایرانی سرکار ءِ نیمگ ءَ شھریانی زندگی ءُ آجوئی ءِ سھاپت ءُ گپ کنوکانی دارگ ءَ ایر جن ایں-

درشان ءَ گوشگ بیتگ کہ انسانی ھکانی واستا کار کنوکانی نشانگ کنگ، سوشل میڈیا ءُ انٹرنیٹ ءِ بندش ءُ زالمی گام برجاہ داشتگ اَنت-

ھمے وڑ ءُ وزائے ھارجہ رودراتکی ڈیھاں ایران ءِ سر ءَ گچین کتگیں کاروائی ھم ایر جتگ اَنت اشانی توک ءَ ریاستی گیر ریاستی مھلوک ءَ سلاہ ءُ درونز ھوار اَنت-

اے رنگیں چیز دمگ ءِ واستا ترسناک اَنت ءُ پیسر ءَ بیوکیں جیڑہ ءُ جنجالاں گیش کپتگ ءُ نی وَ چد ءُ گیش-

زانگ بہ بیت ایران ءَ زھرشانیانی درچ ھما وھد ءَ بندات بیتگ شانزدہ ستمبر ءَ برکہ ءِ سر ءَ نہ کنگ ءَ کرد ورنائیں جنک مھسا امینی دزگیری ءَ پد پولیس ءِ زندان ءَ بیران بیتگ ات-

اے زھرشانیاں ایران وَ تل تل کتگ بلے اے درچ ءَ ایران ءَ زھرشانی کنوکاں ھم بازیں کچے ءَ وتی جان ءُ ساھاں زبھر کنگ کپتگ-

اے زھرشانی تھران ءَ بندات بیتگ ات اَنت ءُ نی وَ سرجمیں ڈیھ ءَ شنگ ءُ تالان بیتگ اَنت ءُ اے زھرشانی نا ایوک ءَ مردین بلکیں زالبول ءُ نودربر ھم ھوار اَنت-

ھمے وڑ ءَ روکپتی بلوچستان ءِ بنجاھی شھر زاھدان ءِ امام جمعہ مولانا عبدالحمید ءَ گوستگیں روچ ءَ آدینگ ءِ نماز ءِ وھد ءَ وتی درشان ءَ ریفرنڈم ءِ لوٹ کرتگ-

مولانا عبدالحمید بلوچ ءَ گوشتگ کہ اد ءَ ڈنی مردم ءُ ڈیھ میان ءَ بہ نند اَنت ریفرنڈم بہ کن اَنت-

زانگ بہ بیت گوستگیں روچ ءَ روکپتی بلوچستان ءَ زھرشانی بیتگ ات ءُ چریے زھرشانی ءَ کم چہ کم پانزدہ مردم بیران ءُ پنجاہ ءِ کچ ءَ مردم زدگ بیتگ اَنت-