روکپتی بلوچستان: زاھدان وئیل ءِ ھلاپ ءَ زھرشانی، لشکر ءِ تیرگواری، پانزدہ بیران ءُ بازیں کچے ءَ زدگ

روکپتی بلوچستان ءِ دمگ ھاش ءَ زاھدان وئیل ءِ ھلاپ ءَ نماز ءَ پد روانک ءُ زھرشانی، زھرشانی روانک ءَ ایرانی لشکر ءَ تیرگواری کرتگ ءُ مردمانی زدگ ءُ بیران بیگ ءِ ھال اِنت-

گیشیں ھالانی رد ءَ روکپتی بلوچستان ءِ دمگ ھاش ءَ نماز ءَ پد کشگ بیتگیں روانک ءِ سر ءَ ایرانی لشکر ءِ تیرگواری ءَ پانزدہ مردم بیران ءُ پنجاہ مردم ءِ کچ ءَ زدگ بیتگ اَنت-

ھمے وڑ ءَ ھاش ءَ ھوار ھوار راسک ءُ سرباز ءَ ھم زھرشانی بیتگ اَنت ءُ اود ءَ سرکاری جاھاں ھوار یک بینکے ماندارگ بیتگ-

زانگ بہ بیت روکپتی بلوچستان ءَ گوستگیں سی ستمبر ءَ روکپتی بلوچستان ءِ بنجاھی شھر زاھدان ءَ ایرانی لشکر ءِ تیرگواری ءَ بازیں کچے ءَ مردم بیران ءُ زدگ بیتگ ات اَنت –

چرے وئیل ءَ پد روکپتی بلوچستان ءَ مھلوک ءِ برانزیکشل ءَ برجاہ اَنت ءُ وھد وھد ءِ سرکاری جاھانی ءُ آفیسرانی سر ءَ ھم اُرش بوگ ءَ اَنت-