بولان: لشکر کشی ءَ زالبول بندیگ، سلاہ بندیں میڑ برجاہ اِنت

بلوچستان ءِ دمگ بولان ءَ مروچی ششمی روچ ءَ ھم لشکر کشی برجاہ اِنت، درزنانی ھساب ءَ زالبول تنی وھدے پوج ءَ بندیگ کتگ اَنت وھدے کہ جتائیں جاھاں میڑ ءِ ھم ھال اِنت-

پاکستانی پوج ءَ بولان ءِ کش ءُ گوراں گوستگیں روچاں مزنیں کچے ءَ لشکر کشی بندات کتگ کہ ءَ مروچی ششمی روچ ءَ ھم برجاہ اِنت – ھمے میان ءَ بالگرداں تیرگواری ءُ بمبگواری کتگ دمگ ءَ جیٹ بالگراب یکشلہ بُرز بالی ءَ گندگ بوگ ءَ اِنت-

پاکستانی پوج ءَ درزنانی زالبول ءُ چک اوچ کمان ءِ کش ءُ گور ءِ دمگاں گپتگ ءُ بندیگ کتگ اَنت کہ آیانی تہ ءَ 13 ءِ پجّار بیتگ، زالبول ءُ چک زورانسری آوار جنیءِ سانمندیں کھول ھم گون اَنت-

ھمے وڑ ءَ پاکستان پوج ءُ بلوچ آجوئی لوٹوکیں سلاہ بندانی میان ءَ جتائیں جاھاں یکرندے پد ءَ میڑ بیتگ اے درگت ءَ گیشیں ھالانی داں انگت سر نہ بیتگ اَنت-

گوستگیں روچاں پاکستانی پوج ءِ بنشون آئی ایس پی آر ءَ دمگ ءَ لشکر کشی ءِ پدری کتگ ءُ گْوشتگ کہ سلاہ بندیں میڑ ءَ دو ایس ایس جی کمانڈوز مرتگ اَنت – آئی ایس پی آر ءَ چار بلوچ آجوئی لوٹوکیں سلاہ بند ءِ مردمانی جنگ ءِ ٹاہ جتگ بلے آ دگہ رسانکدراں انگت اشی ءِ پدری نہ بوتگ-

اشی ءَ پد بلوچ لبریشن آرمی ءِ جارکش جیئند بلوچ ءَ درشان شنگ کتگ ءُ گْوشتگ کہ میڑ ءَ پاکستان پوج ءِ ھشت ایس ایس جی کمانڈوز جتگ-

بولان لشکر کشی ءَ زالبول ءُ چکانی بند کنگ ءَ انسانی ھکانی گلاں ھوار دگراں تُرس درشان کتگ وھدے کہ واکدار ایرجنگ ءِ دیمپانی بوگ ءَ اِنت-

بلوچ یکجھتی کمیٹی ءِ جارکش ءَ گْوشتگ کہ بولان دمگاں چہ درزناں زالبول ءُ چُک پاکستانی پوج ءَ آوار جتگ ءُ ناشناسیں جاھے ءَ برتگ اَنت کہ آیانی درگت ءَ دمگی مردماں ھچ سرپدی نیست وھدے کہ دومی نیمگ ءَ بولان ءِ جتائیں دمگ ءَ گوستگیں پنچ روچ ءَ چہ سرجمی ءَ انگر ءَ اِنت چریشی ءَ مردمانی واستا ساہ ءِ کشگ ھم بلاھیں مشکلیں-

جارکش ءَ دیمتر ءَ گْوشتگ کہ دمگ ءِ تہءَ تُرس ودی بیتگ ءُ دمگی میتگاں بُنکی زرورتیں توژگ چہ سرجمی ءَ زبھر کنگ بیتگ اَنت چریشی ءَ یک انسانی دردناکی ءِ ردوم زورگ ءِ ھترہ ودی بیتگ- دمگانی انگر کنگ، راج ءَ بُنکی زرورتءِ توژگاں چہ زبھر کنگ جنگی جرم اِنت – ھزارانی مردماں اے وڑ مرگ ءِ دپ ءَ یل دیگ یک بلاھیں انسانی ھکانی بگیری اِنت-