کیچ ھیرونک ءَ پاکستانی پوج ءِ سر ءَ بوتگیں اُرش ءِ زمّہ واری بی ایل ایف ءَ منّ اِتگ

سربوتگیں ھالانی رِد ءَ گوستگیں روچ ءَ بزاں دو نومبر ءِ شپ ءَ ناشناسیں سلاہ بندیں مردماں کیچ ءِ دمگ ھیرونک ءَ پاکستانی پوج ءِ سر ءَ اُرش کُتگ –

اُرش ءِ ھیرونک ءِ کوھی دمگاں برجاھیں پوجی پانگسے ءِ سر ءَ کنگ بوتگ چریشی ءَ پاکستانی پوج ءَ جانی ءُ مالی تاوان ءِ دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ –

جارکش ءَ وتی درشان ءِ تہ ءَ گوشتگ کہ دو نومبر ءِ شپ ءِ ادار دھ ءَ سرمچاراں ھیرونک ءِ کوھی دمگاں برجاھیں پوجی پانگسے ءِ سر ءَ راکٹ ءُ دگہ مزنیں سلاھاں گوں اُرش کتگ – اُرش ءَ پوج ءَ جانی ءُ مالی تاوان رستگ –

آئی ءَ وتی درشان ءِ گڈسر ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –