بولان ءَ لشکر کشی برجاہ چک ءُ زالبول ھوار یازدہ مردم آوار جتگ ءُ بیگواہ کتگ اَنت

بلوچستان ءِ دمگ بولان ءَ مروچی پنچمی روچ ءَ پاکستانی پوج ءِ لشکر کشی برجاہ ءَ اِنت – پوج ءَ چُک ءُ زالبول آوار جتگ اَنت، جنگی بالگردانی بُرز بالی دمگ ءَ یکشلہ برجاہ ءَ اِنت-

ٹی بی پی ءَ سربیتگیں ھالانی رِد ءَ پاکستانی پوج ءِ کارندھاں بولان ءِ دمگ اوچ کمان ءَ زالبول ءُ چک یکجاہ مچ کتگ اَنت داشتگ اَنت- کہ آ تُرندیں سارتی سر ءَ نادینتگ اَنت وھدے کہ اشانی تہ ءَ چُکاں ھوار پیرکماش ھوار اَنت-

دومی نیمگ ءَ اے ھال ھم سر بوگ ءَ اِنت کہ پاکستانی پوج ءَ زالبول گوں چُکاں ھوار یازدہ مردم آوار جتگ ءُ بیگواہ کتگ اَنت-

پوج ءِ دست ءَ آوار جنگ بیتگیں زالبول ءُ چُکانی پجّار سمو سمالانی، زربخت سمالانی، بانی سمالانی ، فریدہ ، سمیدھا سمالانی ، راجی سمالانی ، ماھسو سمالانی، گُل بی بی سمالانی ، زرگُل مری ، حنیپہ مری ءُ دُرخاتون مری نام ءَ چہ بیتگ اَنت-

زانگ بہ بیت اوچ کمان ءِ دمگ ءَ پیسر ءَ بمب گواریں بالگرداں شیلنگ کتگ اَت وھدے کہ اے دمگ ءَ تراکانی توار اش کنگ بیتگ-

دمگی ھالانی رِد ءَ روگ ءُ آھگی سرجمیں راہ ءُ در بند بوگ ءِ سبب ءَ دمگ ءَ ورگی توژگ کمی ودی بیتگ- سرجمیں دمگ کرفیو جنگ بیتگ- میتگانی سر ءَ تُرندی کنگ بوگ ءَ اِنت- ھمے میان ءَ نادُراھاں تُرندیں دلسیاھی ءِ دیمپانی اِنت کہ آیاں دوا درمان ءُ ڈاکٹرانی گور ءَ روگ ءَ نیلگ اَنت-

مروچی پنچمی روچ ءَ ھم جتائیں جاھاں بالگرد شیلنگ ءُ بمبگواری کنگ ءَ اَنت چریشی ءِ آسر ءَ لَس مھلوک ءَ جانی ءُ مالی تاوان ءِ ھال آھگ ءَ اِنت –

اے ھال ھم سر بوگ ءَ اِنت کہ کوھی دمگاں گلہ کشت ءُ کشاراں لوگاں چہ در کنگ ءُ تیرباران کنگ ءَ اَنت کُشگ ءَ اَنت ءُ اے گمان کنگ بوگ ءَ اِنت لَس مھلوک ءَ بلوچ جُھدکار پدر کن اَنت-

گوستگیں روچ ءَ پاکستانی پوج بنشون آئی ایس پی آر ءَ دمگ ھَ لشکر کشی راست کتگ ءُ گْوشتگ کہ سلاہ بندیں میڑ ءَ دو ایس ایس جی کمانڈوز مرتگ اَنت- آئی ایس پی آر ءَ چار بلوچ آجوئی لوٹوکانی جنگ ءِ ٹاہ جتگ بلے تنی وھدے دگہ رسانکدر ءَ اے گپ راست کنگ نہ بیتگ-

اشی ءَ پد بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ میڑاں پاکستانی پوج ءِ ھشت ایس ایس جی کمانڈوز جتگ –

بولان ءُ کش ءَ گوراں لشکر کشی ءِ بندات انچیں وھدے ءَ کنگ بیتگ وھدے بلوچ لبریشن آرمی ءَ گْوستگیں روچاں دزگیر کتگیں دو پاکستانی پوج ءِ کارندھانی یل کنگ ءِ بدل ءَ وتی لوٹانی ھاتر ءَ چار نومبر ءَ تاں گُڈی روچ داتگ-

گوستگیں روچاں بی ایل اے ءِ جارکش ءَ رسانکدر ءَ شنگ کتگیں درشان ءِ تہ ءَ بی ایل اے پاکستانی پوج ءَ جنگی بندیگانی بدل ءِ ھاتر ءَ دگہ یک ھپتگے وھد داتگ، چریشی ءَ پد بی ایل اے ءِ دزگیریں جنگی بندیگاں جونیئر کمیشنڈ آفیسر کیلم اللہ ءُ ملٹری انٹیلیجنس ایجنٹ محمد فیصل ءَ بلوچ راجی آمیدگس ءَ چہ رسوکیں سزا ءِ سر ءَ گامگیج زورگ بیت-

زانگ بہ بیت بلوچ راجدوستیں گل ءُ انسانی ھکانی ءِ جتائیں گلاں باز رند ءَ پاکستانی پوج سر ءَ اے بھتام جنگ ءُ آھگ ءَ اَنت کہ بلوچ جنگولانی سر ءَ لشکر کشی ءِ نام ءَ بلوچستان ءِ کوھی دمگ میتگ ءُ لَس مھلوک سر ءَ بمبگواری کنگ بیت ءُ ھمے میان ءَ دزگیری ءُ کُشتگیں مردماں جنگول پدر کن اَنت-