کلات ءَ پاکستانی پوج ءُ ٹاور ءِ ماندارگ ءِ زمہ واری بی ایل اے ءَ منّ اِتگ انت

سربوتگیں ھالانی رِد ءَ مروچی کلات ءِ دمگ خزینئی ءَ پاکستانی پوج ءِ کاروان ءِ سر ءَ بمب تراک ءِ کنگ بوتگ، بمب تراک ءَ پاکستانی پوج ءَ جانی ءُ مالی تاوان بوتگ –

پاکستانی پوج ءِ کاروان ءِ سر ءَ ھما وھد ءَ بمب تراک کنگ بوتگ وھدیکہ پوج ءِ کاروان بنجاھی شھدگ ءَ گوزگ ءَ بوتگ انت کہ پوج ءِ یک گاڑی ءِ تراکناکیں شوروانی زدگ اتکگ ءُ تباہ بوتگ –

ھمے وڈ گوستگیں روچاں بزاں بیست ءُ ھشت اکتوبر ءَ ناشناسیں مرماں کلات ءِ دمگ منگچر ءَ یوفون ٹاور ءِ سر ءَ اُرش کتگ ءُ آئی مشین مانداشتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ واری منّ اِتگ انت –

جارکش جئیند بلوچ ءَ وتی درشان ءِ تہ ءَ گوشتگ کہ بی ایل اے ءِ سرمچاراں مروچی کلات خزینٹی ءِ ھند ءَ زورگیریں پاکستانی پوج ءِ گاڑی ءِ تراکناکیں شوروانی نشانگ کتگ – پوجی کاروان ءَ ھواریں گاڑی ھما وھد ءَ نشانگ کتگ وھدیکہ آ بنجاھی شھدگ ءَ گوزگ ءَ بوتگ انت، تراک ءَ کم چہ کم یک دژمن کارمندے مرتگ ءُ پنچ زدگ بوتگ انت وھدیکہ گاڑی ءَ سک باز تاوان بوتگ –

جارکش ءَ دیمتر ءَ وتی درشان ءِ تہ ءَ گوشتگ کہ مئے سرمچاراں بیست ءُ ھشت اکتوبر دوھزار بیست ءُ دو ءَ کلات ءِ دمگ منگچر ءَ پڈماران ھند ءَ برجاھیں یوفون کمپنی ءِ ٹاورءِ چیر ءَ تراکناکیں شورہ ھم کل کتگ ءُ تراکین اتگ انت چریشی ءَ ٹاور تباہ بوتگ ءُ ایندگہ مشین ھم مانداشتگ انت – اے ٹاور نزیکیں دگہ دو ٹاوراں ھم سگنل دیگ ءَ بوتگ –

آئی ءَ گوشتگ کہ اے موبائیل ٹاور کمپنی ءَ کلات ءَ دگہ ھنداں ھم پاکستانی پوج ءِ گوشگ پد ءَ بازیں ھنداں وتی ٹاور مِک کتگ انت، کہ پہ چاریگری ءَ کارمرز بوگ ءَ انت – گوستگیں روچاں اے ٹاور کمپنی مکن کنگ بوتگ انت کہ وتی جاسوسی کنگ ءَ ھلاس بہ کن انت –

گڈسر ءَ جارکش ءَ وتی درشان ءِ تہ ءَ گوشتگ کہ بلوچ لبریشن آرمی ھردو ارشانی زمہ واری ءَ منّیت ءُ زورگیریں پوج ءُ آئی ءِ کمک کارانی سر ءَ مئے اُرش ھمے داب ءَ برجاہ مان انت-