سر بیتگیں ھالانی رد ءَ روکپتی بلوچستان ءِ دمگ سراوان ءَ گوستگیں روچ ءَ ایرانی لشکر ءَ یک مردمے آوار جنگ ءَ پد بیگواہ کرتگ –
گیشیں ھالانی رد ءَ گوستگیں روچ ءَ آدینگ ءِ نماز ءَ پد ایرانی لشکر ءَ یک مردمے آوار جنگ ءَ پد بیگواہ کرتگ-
بیگواہ کنگ بیتگیں مردم ءِ پجار امید بلوچ زئی ء مرزا ءِ نام ءَ زانگ بیتگ کہ آ سراوان ءِ جھمنند اِنت-
آئی ءِ آوار جنگ ءَ پد لشکر ءَ آ ناشناسیں جاھے ءَ برتگ ءُ چریشی ءَ پد آئی ءِ ھچ ھال نیست اِنت-
زانگ بہ بیت گوستگیں روچ ءَ روکپتی بلوچستان ءِ بازیں جاھاں زھرشانی درچ برجاہ بیتگ اَنت کہ آیاں زاھدان ءَ بیتگیں زھرشانیانی پلامرزی کرتگ-
گوستگیں روچ ءَ یک رندے پد ءَ ایرانی لشکر ءَ زاھدان ءَ زھرشانی کنوکانی سر ءَ تیرگواری کتگ ات ءُ چریشی ءَ چہ بازیں مردمے زدگ ءُ بیران بیتگ ات ءُ اے بیران بیتگیں مردمانی تہ ءُ زھگ ھم ھوار ات اَنت-
روکپتی بلوچستان ءَ یک ماھے بیت کہ اود ءَ جاور ناگیگی ءِ دیمپان اَنت ءُ چریشی ءَ بازیں مھلوکے زند ءِ ھمک روچی شاتمانیاں چہ زبھر اَنت-