گوادر ءَ زورانسری آوار جنیانی بگیری ءَ زھرشانی

بلوچستان ءِ تیاب دپی دمگ گوادر ءَ بلوچ یکجھتی کمیٹی ءِ چیردستی ءَ زورانسری آوار جنیانی بگیری ءَ زھرشانی کنگ بوتگ –

زھرشانی ءَ پوج ءِ دست ءَ زورانسری آوار جنگ بوتگیں عظیم دوست، بولان کریم، نسیم بلوچ ءُ دگہ بیگواھیں مردمانی کھولاں ھوار راجداریں پاٹیانی دمگی رھشون، زھگ ءُ زالبولاں مزنیں کچے ءَ بھر زرتگ –

درنگاز کنوکانی گوشگ ات کہ بلوچ وتی سرڈگار ءُ ڈیھے ءِ واھند انت، یک ھنچیں سرڈگارے کہ مال ءُ مڈی ءَ سر ریچ انت بلے اشی ابید ھم بلوچ وتی سرڈگار ءِ سر ءَ کسمپرسی گوں دچار انت، وانندھیں نودربر آوار جنگ بوگ انت، ژانگولیں جون چگل دیگ بوگ ءَ انت، اگاں آھانی سر ءَ الزام ءِ ھست گڈا آمیدگس ءَ آرگ بہ بنت –

درنگاز کنوکانی گوشگ ات کہ بلوچستان ءَ ریاستی زلم ءُ زوراکیاں چہ بلوچستان ءِ جھمنندیں مردم ماژگی نادراہ جوڈ بوتگ انت، بیگواھیں مردمانی زھگ وانگجاھے رؤگ ءِ بدل ءَ وتی دوستیگیں مردمانی یل کنائینگے ھاتر ءَ زھرشانی کنگ ءَ انت، ریاست ایشی ءَ شری ءَ بہ زانت ءُ سرپد بہ بیت کہ بلوچ وتی دوستیگیں مردمانی زورانسری آوار جنی ءِ بگیری ءَ ھچبر ھاموش نہ بنت انت –

آھانی گوشگ ات کہ ریاست جرمکار انت کہ مردماں سالاں سال وتی بندیگ جاھاں بمد کنت- اگان اے مردم جرمکار انت گڈا آمیدگس ءَ آرگ بہ بنت اے وڈ بیگواہ کنگ وت جرمے ءُ اے جرمکاری چہ ریاست ءِ نیمگ ءَ بوگ ءَ انت –

ھمے میان ءَ زھرشانی ءَ ھواریں بلوچ زھگاں چہ ریاستی ادارھاں جست کتگ کہ ما مزن بئے مارا ھم آوار جنگ بیت اِنت –

زھرشانی ءَ بھر زوروکیں بیگواھیں عظیم دوست ءِ گھار رخسانہ ءَ گوشتگ کہ منی برات ءِ زورانسری آوار جنی ءَ ھپت سال پر گوستگ، ھمک روچ ما دگانی سر ءَ در کائیں ءُ انساپ ءِ لوٹ ءَ کن ایں بلے پدا ھم انچو زھرشانیاں ابید برزی تبک ءِ واکدارانی گوشاں مورے ھم نہ وارت –

رخسانہ ءَ گوشتگ کہ مئے لوٹ مدامی ھمیش انت کہ برات یل کنگ بہ بیت ما مدامی ھمے لوٹ ءَ کنگ ءَ انت کہ اگاں آئی ءَ کتکاری ءِ کتگ گڈا آمیدگس ءَ آرگ بہ بیت ءُ جرمکاری زاھر کنگ بہ بیت بلے اے آمیدگس ھم انساپ دیگ ءَ بے سوب بوتگ انت –

بیگواھیں مردمانی کھولانی گوشگ ات کہ پاکستان ءِ رھبندانی تہ ءَ اے ھست انت کہ ھر کسے کتکاری ءِ کنت گڈا آمیدگس آئی ءَ شزا دنت بلے مئے ورنا سالاں سال بیگواہ کنگ بنت ءُ آھانی ژانگولیں جون چگل دیگ بنت –

گوادر ءِ زھرشانی ءَ درنگاز کنوکانی گوشگ ات کہ بلوچستان ءَ سُھر دگہ مڈیاں ھوار جون ھم در آھگ ءَ انت چدوپیسر ھزدار ءُ پنجگور ءَ بازیں جون ءِ دست کپتگ، پدا شال دشت کبرستان ءَ کبرانی یک دمگ ءِ جوڈ نوں پنجاپ ءِ نادراھجاھاں ھم بیگواھیں مردمانی جون دست کپگ انت اے درستیں کاراں ریاستی ادارھانی دست مان انت *

آھانی گوشگ ات کہ اے درسیں ناھکیانی بگیری ءَ وھدیکہ بلوچستان ءِ مردم پہ زھرشانی ءَ در کائینت گڈا دومی روچ ءَ ھما آوار جنگ بنت نوں بلوچ چہ اے زوراکیاں تنگ انت نوں چدوگیشتر وتی توار ءَ چست کن ایں –

ھمے وھد ءَ دگہ ترانکاراں ھم بلوچستان ءَ زورانسری اوار جنگ بوتگیں مردمانی یل کنگ ءِ لوٹ کتگ ءُ گوشتگ کہ پاکستان ءِ واکدار زورانسری آوار جنی ءَ ھمینچو دراج کش دیاں اے پہ ھماھاں گیشتر جیڑہ پیداک کن انت پرچا کہ بلوچستان ءِ جھمنندیں مھلوک وتی دوستیگیں مردمانی بیگواھی ءَ ھچبر ھاموش نہ بنت ءُ نہ نند انت –