پاکستانی پوج ءَ چہ وندر ءَ دو ورناہ آوار جتگ ءُ بیگواہ کتگ اَنت-
سربوتگیں ھالانی رِد ءَ گوستگیں روچ ءَ بیگاہ ءَ سی ٹی ڈی ءَ بلوچستان ءِ ضلع ھب چوکی ءِ تھسیل وندر ءَ یک لوگے ءَ بیڑبرتگ ءُ دو ورناہ زورانسری آوار جتگ ءُ گوں وت برتگ اَنت کہ آیانی پجّار سعود بلوچ ءُ کامران نور نام ءَ چہ بیتگ اَنت-
سعود میڈیل نودربرے وھدے کہ آ ھمے وھد ءَ گوں سیادے ءِ ھمراھی ءَ وندر ءَ اَتکگ بیتگ-
زانگ بہ بیت سرجمیں بلوچستان ءَ یکرندے پد ءَ پاکستانی پوج ءِ دست ءَ زورانسری آوار جنی وئیل ءِ تہ ءَ گیشی گندگ بیگ ءَ اِنت-
ھمے ھپتگ ءَ بلوچستان ءِ جتائیں جاھاں درزنے مردم زورانسری آوار جنی ءِ کیسز نکش کنگ بیتگ اَنت- وھدے کہ پوج ءَ حفیظ ء روزی خان ءُ ھاران ءَ دو برات یوسف بادینی ءُ پرویز بادینی ء فیض محمد بادینی آوار جتگ ءُ گوں وت برتگ اَنت-
ھاران ءَ بیست ءُ چار کلاکانی تہ ءَ آوار جنی ءِ پنچ کیس نکش کنگ بیتگ- گوستگیں شپ ءَ پاکستانی پوج ءَ سے مردم جابر یلانزئی ء پزیر احمد، نجیب اللہ یلانزئی ء محمد حسین ءُ شفقت یلانزئی ء عبدالرحیم آوار جتگ ءُ ناشناسیں جاھے ءَ برتگ اَنت-
اشانی تہ ءَ جابر یلانزئی ءُ نجیب اللہ یلانزئی گوستگیں روچ ءَ آجو بیتگ اَنت وھدے کہ سیمی مردم انگت بیگواہ ءَ اِنت-