روکپتی بلوچستان: ایرانی لشکر ءِ تیرگواری ءَ یک ورنایے زدگ

روکپتی بلوچستان ءِ دمگ ایرانشھر ءَ ایرانی لشکر ءِ تیرگواری ءَ یک ورنایے زدگ بیتگ –

زدگ بیتگیں ورنا ءِ پجار امیر حسین زنگشائی ءِ نام ءَ زانگ بیتگ ءُ آئی ءِ اُمر پانزدہ سال گوشگ بیگ ءَ اِنت-

ھالانی تہ ءَ گوشگ بیتگ کہ اے ورنا وانگجاہ ءَ واتر لوگ ءَ روگ ءَ بیتگ کہ ایرانی لشکر ءَ تیرگواری کتگ –

ایرانی لشکر ءَ بھتام جتگ کہ اے ورناہ سلاہ بند بیتگ ءُ روگ ءَ بیتگ-

ھالانی تہ ءَ گوشگ بیتگ کہ ایرانی لشکر ءَ آئی ءِ کھول ءَ را بیھار داتگ ءُ گوشتگ کہ اگاں شما اے ھال ءِ رپورٹ کرت گڑا شمئے ھلاپ ءَ بیڑ برگ بیت اِنت-

زانگ بہ بیت گوستگیں سال ءَ داں انیگ ءَ پنجاہ ءُ دو چوشیں وئیل رپورٹ بیتگ اَنت ءُ اشانی توک ءَ تیرگواریاں ھپتاد ءُ ھپت مردم زدگ ءُ بیران بیتگ اَنت- اشانی تہ ءَ بیست ءُ نُھ مردم زدگ ءُ چل ءُ ھشت مردم بیران بیتگ اَنت-

چل ءُ ھشتیں مردمانی تہ ءَ دو زالبول ءُ پنچ دگہ کسان سالیں زھگ ھوار اَنت-