بلوچ یکجھتی کمیٹی ءِ جارکش ءَ رسانکدراں وتی شنگ کرتگیں درشان ءِ تہ ءَ سی ٹی ڈی ءِ دروگیں میڑ ترندی ءَ گوں ایرجتگ ءُ گوشتگ کہ سی ٹی ڈی ءَ دست ءَ بلوچ ءِ چکچینی بوگ ءَ انت ءُ ھمک روچ اشی ءِ تہ ءَ گیشی آرگ بوگ ءَ انت وھدیکہ سرکار ، آمیدگس، پاکستان ءِ مزن آمیدگس ءُ وتگڑیں راج دوستیں پاٹیاں وتی چم بستگ ءُ ھچ گوشگ ءَ نہ انت ھمے سوب ءَ دروگیں میڑاں زورانسری آوار جنگ بوتگیں مردمانی کوش ءِ تہ ءَ گیشی آرگ بوگ ءَ انت کہ سک باز پدردی یے ءُ اشی ءَ چہ پدر بیت اِنت کہ ملک ءِ تہ ءَ ھچ وڑیں کانود ءُ انساپ نیست اِنت بلکیں یک راجے ءِ چکچینی ءَ دراہ وتی کتکاری ءَ کرد ءَ پیلو کنگ ءَ انت –
جارکش ءَ گوشتگ کہ بلوچستان ءِ تہ ءَ گوستگیں دو دھک انت کہ زلم زوراکیانی نہ اوشتوکیں درچ ءِ برجاہ انت بلے جیڑھے گیش ءُ گیواری بدل ءَ آ گیشتر ھراب کنگ بوگ ءَ انت – ھمے سال ءَ بلوچستان ءِ جتا جتائیں ھند ءُ دمگان زورانسری آوار جنگ بوتگیں مردم دروگیں میڑاں کُشگ بوتگ انت – نیوکاھان ءَ سی ٹی ڈی دست ءَ گوستگین سال ءِ بیست ءُ پنچ اگست ءَ پنچ زورانسری آوار جنگ بوتگیں مردم کُشگ بوتگ انت – چہ ڈیرہ بگٹی ءَ دو زورانسری آوار جنگ بوتگیں مردم پشین ءَ درگیں میڑ ءَ کُشگ بوتگ انت – وھدیکہ ھمے سال ءَ سی ٹی ڈی ءِ نیمگ ءَ دروگیں میڑانی تہ ءَ گیشی اتکگ ھمے سال ءِ پانزدہ جولائی ءَ زیارت ءَ دروگیں میڑے ءَ نھ بلوچ پرزند کُشگ بوتگ انت کہ اشی ءِ بگیری ءَ راجی زرمبشت ءِ چست بوتگ ات بلے اشی ءَ ابید ھم سی ٹی ڈی ءِ دروگیں میڑاں کُشت ءُ کوشانی درچ ھلاس نہ بوتگ انت ءُ گوستگیں روچاں مستونگ ءُ ھاران ءَ دگہ دو دروگیں میڑ ءِ ڈرامہ کنگ بوتگ کہ آھانی تہ ءَ پنچ جون مستونگ ءُ چار مردمانی جون ھاران ءَ آرگ بوتگ انت کہ دروگیں میڑے نام ءَ کُشگ بوتگ انت – جارکش ءَ گوشتگ کہ اے ھم.گمان کنگ بوگ ءَ انت کہ نشتر ءِ نادراھجاہ ءَ آرگ بوتگیں مردمانی ژانگولیں جون ھم بیگواھیں مردمانی انت چدوپیش اے وڑیں جون لاھور ءَ ھم دست کپتگ انت بلے ھما زوتاں اے ھال چہ رسانکدراں گار کنگ بوتگ- گمان بیت کہ نشتر نادراھجاہ ءِ وئیل ءِ چیردئیگ ءِ ھاتر ءَ یکرندے پد ءَ دروگیں میڑے ڈرامہ کنگ بوگ ءَ انت –
جارکش ءَ گڈسر ءَ وتی درشان ءِ تہ ءَ گوشتگ کہ دست گوشیں ءُ پیسر ءَ زورانسری آوار جنگ بوتگیں مردمانی کوش ءَ ریاست ءَ ھچ نرسیت بلکنہ اشی ءَ چہ جاور گیشتر ھراب بنت، آمیدگس ءُ سیاسی پاٹیانی ھچ نگوشگ ءَ بلوچستان چدوگیشتر آس ءُ ھون ءِ بیت اِنت کہ اشی ءِ سنگینیں برورد درکائینت – ھمے زوتاں بوتگیں وئیل ءُ سی ٹی ڈی ءِ کُشت ءُ کوشانی سر ءَ انسانی ھکانی گل ءُ آمیدگس ءِ ھچ نگوشگ پدردی یے کہ چریشی ءَ سی ٹی ڈی ءِ وڑیں پوج ءَ پہ کُشت کوش ءَ.گیشتر موہ رسیت آھاں اے وئیلانی سر ءَ وتی ھاموشی ھلاس کنگی انت –