بلوچستان ءَ جتاجتائیں وئیلاں نُھ مردم بیران ءُ بیست ءُ یک مردم ٹپی بیتگ اَنت

بلوچستان ءِ جتاجتائیں دمگاں تیرگواری ءُ دگہ وئیلانی آسر ءَ نُھ مردم بیران ءُ بیست ءُ یک ٹپی بیتگ اَنت-

اے وئیل شال، نوشکی، سورابط دکی ءُ ژوب ءَ بیتگ اَنت-

شال تفتان ھائی وے سر ءَ شیخ واصل ءِ نزیک ءَ گاڑی ءُ پک اپ میان ءَ ڈک ورگ ءِ آسر ءَ یک زالبولے بیران وھدے کہ یک جنکوے ءِ ھوار دو مردم بیران بیتگ اَنت وھدے کہ یک پک اپ دیم ءِ آؤکیں گاڑی ءَ گوں ڈِک وارتگ چریشی ءِ آسر ءَ پنچپائی ءِ جھمنندیں یک زالبولے ھما دمان ءَ مرتگ وھدے کہ یک جنکوے ءُ عبدالقیوم نامیں مردمے سک ٹپی بیتگ اَنت-

سوراب ءَ ٹماٹراں پُریں مزدا ٹرک پیماز ءَ چہ پُریں دس ویلر ٹرکے ءَ گوں ڈِک وارتگ- وئیل ءَ دو برات بیران وھدے کہ سے مردم ٹپی بیتگ اَنت- بیران بیتگیں براتانی سیادی چہ قلعہ عبداللہ ءَ اِنت-

لورالائی ءَ زمین ءِ جیڑہ ءِ سر ءَ دو ٹولیانی تیرگواری ءِ آسر ءَ رحمت اللہ ء عبداللہ جان ھما دمان ءَ مرتگ-

نوشکی آر سی ڈی شھدگ سر ءَ کیشنگی ءِ نزیک ءَ گوستگیں روچ ءَ بیگاہ ءَ بروبکس گاڑی دیم ءَ آؤکیں ویگو گاڑی ءَ گوں ڈِک وارتگ چریشی ءِ آسر ءَ ڈرائیور بیران وھدے کہ شانزدہ مردم ٹپی بیتگ اَنت، آیانی تہ ءَ زالبول ءُ چُک ھوار اَنت-

ٹپی ٹیچنگ نادُراھجاہ ءَ برتگ اَنت بیران بیتگیں ڈرائیور ءِ سیادی چہ چاغی ءَ اِنت-
.
مروچی دکی ءِ دمگ زرباری بائی پاس سر ءَ کول مائنز جاہ ءَ یک مردمے ءِ پجّار نہ بیتگیں لاشے دزکپتگ-

پولیس رِد ءَ یازدہ سال ءَ چہ بندیں چات ءِ کار دوبر کار بندات کنگ ءِ وھد ءَ نُھ سد پُٹ جُھلانکی ءَ چہ یک مردمے ءِ پجّار نہ بیتگیں لاشے دزکپتگ کہ آئی ءِ پجّار ھاتر ءَ ڈی این اے ٹیسٹ ءِ واستا جان ٹکرانی زیرگ ءَ پد لاش مائنز کبرستان ءَ کل ءُ کسارت کنگ بیتگ-

بلوچستان ءِ ضلع ژوب ءَ پکنک ءِ وھد ءَ آپ ءِ تہ ءَ یک ورنایے بُک اِتگ ءُ بیران بیتگ-

اِھوالکارانی رِد ءَ ژوب ءِ دمگ قبرووند ءَ پکنک ءِ وھد ءَ سمیع اللہ نامیں ورنایے آپ تہ ءَ بُک اِتگ بیران بیتگ کہ آئی ءِ لاش سول نادُراھجاہ ژوب ءَ پہ گیشیں چار ءُ ٹپاس ءَ پد کھول ءَ داتگ-

بلوچستان ءِ مزن شھر شال ءَ گوستگیں اوگان پولیس کماندار ناشناسیں مردمانی تیرگواری ءَ چہ بیران بیتگ-

پولیس رِد ءَ عبدالصمد اچکزئی گوریچی بائی پاس ءِ دمگ پرکانی گلی ءَ یکشمبے ءِ سُھب ءَ کُشگ بیتگ-

پولیس ءِ ڈیوٹی اپسر محمد اسحاق ءَ گْوشتگ کہ عبدالصمد ءُ آئی ءِ برات لوگ نزیک ءَ ھما وھد ءَ ناشناسیں مردماں تیرگواری ءِ نشانگ کتگ اَنت وھدے آ پرپٹ سر ءَ روگ ءَ بیتگ اَنت-

پولیس اپسر محمد اسحاق رِد ءَ تیرگواری ءَ عبدالصمد ءِ برات رکّ اِتگ وھدے کہ تیرگواری ءِ نشانگ ءَ اَتکگیں یک راھگوزے ٹپی بیتگ- لاش ءُ ٹپی نادُراھجاہ ءَ برگ بیتگ اَنت-

دمگ ءِ ایس ایچ او منظور ءَ پدر کتگ گْوشتگ کہ کُشکارانی سیادی چہ اوگانستان ءِ استان قندھار ءَ بیتگ اَنت ءُ آ گوستگیں اوگان ھکومت ءَ پولیس کماندار بیتگ-

آئی ءِ گْوشگ اِنت کہ کُوش ءِ سوب اوگانستان ءَ دُژمنی بیت کنت بلے کُشگ بیتگیں کھول مردماں انگت کس نام دپ نہ کتگ ءُ ناشناسیں مردمانی بگیر ءَ ایف آئی آر نکش کنگ ءَ ارزبندی داتگ-