نصیر آباد: سی ٹی ڈی ءِ دروگیں میڑ ءَ چاریں مردمانی پجار بوتگ انت

گوستگیں روچانی تہ ءَ نصیر آباد ءِ دمگ نوتال ءَ کاؤنٹر ٹیررزم ڈیپارٹمنٹ (سی ٹی ڈی) ءِ دورگیں میڑ ءَ کُشگ بوتگیں چاریں مردمانی پجار بوتگ کہ آ پیش ءَ زورانسری آوار جنگ ءُ بیگواہ کنگ بوتگ انت –

کُشگ بوتگیں مردمانی پجار غلامی، جیسف، صدام ءُ مراد ءِ ناماں چہ بوتگ انت –

ھر چاریں مردم دگہ دگہ جاھاں پوج ءَ زورانسری آوار جتگ ءُ بیگواہ کتگ بوتگ انت کہ گوستگیں روچاں سی ٹی ڈی ءِ دروگیں میڑ ءَ کشگ بوتگ انت –

زانگ بہ بیت چدوپیش ھم سی ٹی ڈی چہ بلوچستان ءَ زورانسری آوار جنگ بوتگیں مردم دروگیں میڑانی تہ ءَ کُشتگ انت، بلوچستان ءِ تہ ءَ سی ٹی ڈی ءِ اے کاراں راجدوستیں پاٹی ءُ انسانی ھکانی گل رد کن انت – راجدوستانی گوشگ انت کہ سی ٹی ڈی ھم پاکستان ءِ چیریں ادارھانی وڈ ءَ مردماں درکانودی آوار جنگ ءُ آھانی کوش ءَ ھوار انت –

چیزے وھد بیت کہ بلوچ راجدوست ، انسانی ھکانی گل سی ٹی ڈی ءِ سر ءَ الزام جنگ انت کہ گوست ءَ ھر ھما کار پاکستان ءِ چیریں ایجنسیاں کتگ انت نوں آ کاراں سی ٹی ڈی کنگ ءَ انت –

بلوچستان نیشنل پاٹی ءِ سروک اختر مینگل ءَ وتی درشان ءِ تہ ءَ گوشتگ کہ بلوچستان ءِ ورنا آوار جنگ بنت ءُ آھانی جون چگل دیگ بنت کہ اشی ءِ الزام پھازگی ادارھانی سر ءَ لڈگ بوتگ بلے نوں بس اشی ءِ مٹ کنگ بوتگ پیش ءَ پوج ھوار بوتگ نوں سی ٹی ڈی ءِ نام دیگ بوتگ –