روکپتی بلوچستان: زھدان ءَ زھرشانی ءَ بیران بیتگیں مردمانی کچ 88 ءَ سر بیتگ اَنت

روکپتی بلوچستان ءِ بنجاھی شھر زاھدان ءَ زھرشانی ءِ وھد ءَ بیران بیتگیں مردمانی کچ 88 ءَ سر بیتگ اَنت ءُ 300 مردم زدگ بیتگ اَنت-

30ستمبر ءَ زاھدان ءِ مزنیں مسیت ءَ آدینگ ءِ نماز ءِ وھد ءَ ایرانی لشکر ءَ بیڑ برتگ ات ءُ اود ءَ آئی ءَ نمازیانی سر ءَ تیرگواری کتگ ات ھمود ءَ چہ بے کساس ءَ مردم زدگ ءُ بیران بیتگ ات اَنت –

چریشی ءَ پد مھلوک ءَ زھرشانی کنان ءَ شھر ءَ دگ ءُ دکان بند کنان ءَ پولیس ءِ بنجل ءُ سرکاری دگہ جاھانی ماندارگ بندات بیتگ ات ءُ پد ءَ اے زھرشانی گر ءُ دار ءَ ایرانی لشکر ءَ ترندیں گامگیج زیران ءَ لس مھلوک ءِ سر ءَ ھم بیڑ برتگ ات ءُ ھمے میان ءَ آئی ءَ شھر ءَ بے کساس ءَ آنسو گیس آس داتگ ات ءُ چریشی ءَ یک زالبولے ھم آنسو گیسانی دمتوسی ءَ بیران بیتگ اَت-

زاھدان ءِ امام جمعہ ءِ پیشوا مولانا عبدالحمید ءَ ھم وتی یک درشانی ءَ گشتگ ات کہ پولیس ءَ لس نمازیانی سر ءَ وتی توپکانی دپ پچ کتگ ءُ آیانی سینگ سُمبان کتگ ءُ شھید کتگ اَنت-

مولانا عبدالحمید ءَ وتی درشانی ءَ گشتگ ات کہ نماز ءَ پد مسیت ءِ نزیکاں برزیں ماڑیانی سر ءَ لس پوشاکی مردماں ھم لس رھگوزی ءُ نمازی نشانگ کتگ ءُ کشتگ اَنت-

زاھدان ءَ چار روچاں یکشل ءَ جاور ناگیگی ءِ دیمپان بیتگ اِت اَنت چریشی ءَ پد زاھدان ءِ کش ءُ گوری دمگاں ھم بازین کچے ءَ مردماں زھرشانی کتگ ءُ ایران ءِ سرکار ءِ ھلاپ ءَ اوگام جتگ ات-

اے زھرشانی چھبار ءَ گوستگیں ماہ ءَ یک پانزدہ سالی جنکوئے ئِے گون ءَ پولیس ءِ آپسرے ءِ زیادتی ءَ بندات بیتگ ات اَنت ءُ چریشی ءَ پد اے زھرشانی روکپتی بلوچستان ءِ جتا جتائیں جاھاں برانز گپتگ اَنت ایرانشھر، چھبار، راسک ءُ دگہ دگہ جھاں ھم اے زھرشانیاں وتی لپیٹ مانپوش اتگ ات-

اے زھرشانی تھنا ھرتال ءُ کوکار ءَ نہ بوت بلکیں اے زھرشانی مٹ بوت ءُ آئی ءَ زاھدان ءَ یک ھونی ئیں جاورے ودی کت ءُ چریشی ءَ بازیں کچے ءَ روکپتی بلوچستان ءِ بلوچ کُشگ بیت اَنت-

زھرشانیانی پژدر ءَ چاگردی رسانکجاھاں ھم درانڈیھی بلوچاں زھرشانی کرتگ ءُ روکپتی بلوچستان ءَ بلوچانی کُشت ءُ کوشانی ھلاس کنگ ءِ کڈنی کتگ ات –

آیاں گوشتگ ات کہ ایران بلوچ نسل کُشی ءَ کنگ ءَ اِنت ءُ چریشی ءَ چہ آ وتی دستاں بہ دار ایت-

بلوچستان ہیومن رائٹس کونسل ءَ ھم گوستگیں روچ ءَ وتی درشانی ءَ روکپتی بلوچستان ءَ بلوچانی کوشانی سر ءَ تچکیں پٹ ءُ پول کنگ ءِ دزبندی کتگ ءُ اشی ءَ ھوار ھوار رودراتکی بلوچستان ءِ سیاسی پاٹیاں ھم وتی درشاناں اے نسل کشی ایر جتگ ءُ ایران ءِ زوراکی ایر جتگ اَنت-