دی بلوچستان پوسٹ
بلوچستان ءِ دمگ تربت ءُ مارگٹ ءَ دوجتائیں بمب اُرشاں پاکستانی پوج نشانگ کتگ اَنت-
ٹی بی پی رسانکدر پتر ءَ سر بیتگیں ھالانی رِد ءَ ضلع کیچ ءِ دمگ تربت ناصر آباد ءَ مروچی نیم روچ ءَ ناشناسیں مردماں پاکستانی پوج ءِ گاڑیاں ھوار کاروان ھما وھد ءَ بمب نشانگ کتگ وھدے کہ آ بُنجاھی شھدگ ءَ گْوزگ ءَ بیتگ-
تراک ءَ پد پوج ءَ دمگ انگر ءَ کتگ وھدے کہ تاوان ءِ درگت ءَ واکداراں ھچ گپ دیم ءَ نیتکگ-
گوستگیں روچ ءَ بولان ءِ دمگ مارگٹ ءَ ناشناسیں مردماں پوج ءِ راہ سر ءَ تراکناکیں شورو چیر کتگ چریشی ءَ بمب ڈسپوزل اسکواڈ ناکارہ کنگ ءَ دلگوش بیتگ کہ ترکّ اِتگ-
اے دوئیں اُرشانی زمہ واری انگت ھچ گل ءَ نہ زرتگ اَنت وھدے کہ اے دمگاں بلوچ آجوئی لوٹوکیں سلاہ بندیں گل پرکار اَنت-
ھالانی رِد ءَ پاکستان ءَ اگست 2022 ءِ مکابلہ ستمبر ءَ سلاہ بندیں اُرشانی کچ گیش بیتگ اَنت – اے ماہ اگست ءِ مکابلہ 35 درسد گیشی ھمراھی ءَ 42 اُرش 2022 ءَ یک ماھے ءَ درستاں چہ گیش بیتگ اَنت-