پنجگور: سال ءُ دو سالاں بندیگیں سَے مردم یل بیتگ اَنت

بلوچستان ءِ دمگ پنجگور ءَ دوسال ءَ پیش ءُ یک سالے ءَ پیش آوار جنگ بیتگیں سَے مردم یل بیتگ ءُ وتی لوگاں سر بیتگ اَنت-

گیشیں ھالانی رد ءَ پنجگور ءِ دمگ پروم ءَ پاکستانی پوج ءِ دست ءَ آوار جنگ بیتگیں سَے کس یل بیتگ ءُ وتی لوگاں سر بیتگ اَنت-

یل بیتگیں مردمانی پجار باسط، فیصل ءُ ناسر ءِ ناماں زانگ بیتگ اَنت-

اشانی تہ ءَ باسط ءُ فیصل یک سالے ءَ پیش آوار جنگ بیتگ اَنت ءُ ناسر دو سال ءَ پیش آوار جنگ بیتگ –

ھر سھیں مردم مروچی یل بیتگ ءُ وتی لوگاں سر بیتگ اَنت –

یل بیتگیں مردمانی یل بیگ ءِ ھال بلوچستان ءَ بیگواھیں مردمانی واستا توار چست کنوکیں گل وائس فار بلوچ مسنگ پرسنز ءَ ھم راست کرتگ –

زانگ بہ بیت بلوچستان ءَ بازیں کچے ءَ مردم گرگ ءُ برگ بیگ ءَ اَنت کہ اشانی توک ءَ گیشتریں مردم ورنایاینت-

بلوچستان ءَ مردم باز کم کساس زندگی ءَ یل کنگ بنت ءُ ھمے داب ءَ بیرانی ءِ دروشم ءَ ھم آیانی لاش آیگ ءَ اَنت-

گوستگیں روچاں سی ٹی ڈی ءَ نسیر آباد ءَ دو مردمانی جنگ ءِ ٹاہ داتگ اَت پد ءَ آیانی پجار بیگواھیں مردمانی ناماں زانگ بیتگ ات اَنت-

ھمے وڑ گوست ءَ ھم زیارت ءَ یک وئیلے ءَ یازدہ مردم کشگ بیتگ ات اَنت کہ آیانی پجار ھم بیگواھیں مردمانی ناماں زانگ بیتگ ات اَنت-

گوستگین روچ ءَ بیگواھیں مردمانی کھولاں درشانی ءَ گشتگ ات کہ سی ٹی ڈی ءِ سھریں دپتر ءَ بیگواھیں مردمانی نام ھوار اَنت چریشی ءَ چہ آ مردماں جنگ ءُ کُشگ اِنت –