روکپتی بلوچستان: ھیلی کاپٹر ءِ تیرگواری ءَ دگہ چار کس بیران

روکپتی بلوچستان ءِ بنجاھی شھر زاھدان “دزاپ” ءَ گوستگیں سَے روچاں چہ برجاھیں زھرشانی ءُ جنگ ءُ چوپاں چہ جاور ھال گھتری ءِ نیمگ ءَ داں انگت ءَ نیتکگ اَنت ءُ مروچی ایرانی لشکر ءَ ھیلی کاپٹرانی سر ءَ تیرگواری کنان ءَ چار مردم کُشتگ اَنت-

روکپتی بلوچستان ءِ بنجاھی شھر زاھدان ءَ چہ ٹی بی پی ءَ سر بیتگیں ھالانی رد ءَ ایرانی لشکر ءَ تیرگوار کرتگ ءُ چار کس کُشتگ اَنت-

تیرگواری ءِ وئیل زاھدان ءَ گوریچانی ھند ءَ کنگ بیتگ کہ اود ءَ چار کس بیران بیتگ اَنت-

بیران بیتگیں مردمانی پجار مرتضی حسن زئی، ذولفقار حسن زئی، ارمان حسن زئی ءُ مھمود حسن زئی ءِ ناماں زانگ بیتگ اَنت-

زانگ بہ بیت روکپتی بلوچستان ءِ بنجاھی شھر زاھدان ءَ آدینگ ءِ روچ ءَ بندات بیتگیں برانزاں تنی وھدی زند ءِ جوانیں آسراتی سرجم نہ بیتگ اَنت دگانی سر ءَ رو ءُ آیگ کم ءُ شھر ءَ ترس ءُ بیم ءِ جاور ودی بیتگ اَنت –

وھد وھد ءِ سر ءَ ایرانی لشکر ءُ سلاہ بندانی میان ءَ ھم جنگ ءُ چوپ بیگ ءَ اَنت، اے زھرشانی آدینگ ءِ روچ ءَ نماز ءَ پد بندات بیتگ اَنت کہ نی زھرشانی درچ مٹ بیتگ ءُ ھونی جاورانی دیمپانی اِنت-

آدینگ ءِ روچ ءَ پنجاہ ءُ ھشت مردم کشگ بیتگ ات اَنت ءُ دو سد ءُ ھپتاد زدگ بیتگ اِت اَنت کہ اے وھد ءَ زاھدان ءِ بازیں نادراہ جاھاں زدگ بیتگیں مردمانی واستا ھون ءِ ھم کمی درپیش بوگ ءَ اِنت –

سرجمیں روکپتی بلوچستان ءَ تنی وھدی الکاپیں انٹرنیٹ ھم پچ کنگ نہ بیتگ اَنت سیاسی مردمانی گوشگ اِنت ’ایرانی لشکر وتی جرمانی چیر دیگ ءَ آئی ءَ انٹرنیٹ سروس بند کتگ ‘-

ھمے وڑ ءَ روکپتی بلوچستان ءَ ھواریں دمگ شیر آباد ءَ ھم ایرانی لشکر ءِ نیمگ ءَ زوراکی کنان ءَ دو وانگجاھانی ماندارگ ءِ ھم ھال اِنت-

دومی نیمگ ءَ روکپتی بلوچستان ءِ دمگ ایرانشھر “پھرہ” ءَ ھم گوستگیں روچ ءَ زھرشانی ءِ وھد ءَ پولیس ءَ سِی مردم دزگیر کرتگ ءُ برتگ اَنت-

گوستگیں روچ ءَ برگ بیتگیں مردمانی کھولاں ایرانشھر ءَ پولیس ءِ کارگس ءِ دیم ءَ نندانک جتگ ءُ نشتگ اَنت بلے گوستگیں بیست ءُ چار ساھاتانی گوزگ ءَ پد ھم آیانی مردمانی بارو ءَ پولیس ءَ دگہ گپ دیم ءَ نیاؤرتگ اَنت-

اے زھرشانی چھبار ءَ پانزدہ سالی ئیں جنکو ماھو ءِ گون ءَ پولیس ءِ اپسر ءِ زوراکی ءَ پد چھبار ءَ بندات بیتگ اِت اَنت ءُ پد ءَ اے زھرشانیانی پلامرزی ءَ زاھدان ءَ ھم زھرشانی بندات بیتگ ءُ اود ءَ جاورانی گر ءُ دار ءَ پولیس ءُ دگہ پورس ھم مزنیں کچے ءَ دارگ بیتگ اَنت-

روکپتی بلوچستان ءَ جاورانی ناگیگی ءِ سبب ءَ یک ھپتگے ءِ واستا وانگجاہ بند کنگ ءُ شھدربرجاھانی نودربراں ھم کلاس بند کتگ اَنت-