گوادر: زورانسری آوار جنیانی بگیری ءَ کھولانی زھرشانی

بلوچستان ءِ تیاب دپی دمگ گوادر ءَ زورانسری آوار جنگ بوتگیں عظیم دوست ءَ ھوار ایندگہ بیگواھیں مردمانی ھاتر ءَ جاوید کمپلکس ءَ بگر تاں سید ظہور شاہ ہاشمی ءِ چار راہ ءَ زھرشانی روانک ءِ کشگ بوتگ –

زھرشانی سَے جولائی سال دوھزار پانزدہ ءَ چہ گوادر ءَ پاکستانی پوج ءِ دست ءَ آوار جنگ بوتگیں عظیم ء دوست محمد کھول ءِ جار پد ءَ کنگ بوتگ کہ اودا چہ گوادر ءَ آوار جنگ بوتگیں ایندگہ بیگواھیں مردمانی کھولاں ھوار راجداریں پاٹیانی دمگی رھشوناں ھوار زھگ ءُ زالبولاں مزنیں کچے ءِ بھر زرتگ –

گوادر ءِ روانک ءَ بھر زوروکیں درنگاز کنوکاں بیگواھیں عظیم دوست ءَ ھوار نسیم بلوچ ءُ ایندگہ بیگواھیں مردمانی اکس ءُ بینر گون بوتگ انت –

زھرشانی ءَ تران کنان ءَ عظیم دوست ءِ گھار رخسانہ دوست ءَ گوشتگ کہ منی برات ءَ ھپت سال ءَ بُرز انت کہ بیگواہ انت ھمک روچ ما دگانی سر ءَ درکائیں ءُ انساپ ءِ لوٹ ءَ کن ایں بلے انچو زھرشانیاں پد ھم برزی تبک واکدار ءُ آوار جنوکانی گوشان مورے نہ وارت –

رخسانہ دوست ءَ گوشتگ کہ ما مدامی ھمے لوٹ ءَ کنگ ءَ ایں کہ مئے برات یل کنگ بہ بنت ما ھمے لوٹ ءل کنگ ءَ ایں کہ مئے برات اگاں کتکار انت گڈا آمیدگس ءَ آرگ بہ بیت آئی ءِ سر ءَ کتکاری ءِ کیس ثابت کنگ بہ بیت بلے آمیدگس ھم انساپ دیگ ءَ بے سوب بوتگ انت –

آئی ءَ گوشتگ کہ ھپت سال انت وتی برات ءِ زورانسری آوار جنی ءِ بگیری ءَ زھرشانی کنگ ءَ انت مئے ٹپانی درمان کنوک کس نیست وتی برات ءِ یل کنگے لوٹ ھچبر دزکش نہ بہ ایں –

ھمے وھد ءَ ایندگہ ترانکاراں بلوچستان ءِ تہ ءَ پاکستانی پوج ءِ دست ءَزورانسری آوار جنگ بوتگیں مردمانی لوٹ کتگ ءُ گوشتگ کہ پاکستان برزی تبک واکدار زورانسری آوار جنی ءِ جیڑہ ءَ ھمینچو گیش دراجکش دئینت ھماھانی ھاتر ءَ جنجال ءِ بیت پرچا کہ بلوچستان ءِ جاھمنند وتی دوستیگیں مردمانی زورانسری آوار جنی ءِ بگیری ءَ ھچبر ھاموش نہ بنت –

درنگاز کنوکاں سرکار ءُ انسانی ھکانی ادارھاں گوں لوٹ کتگ کہ عظیم دوست ءَ ھوار ایندگہ بیگواھیں مردم یل کنگ بہ بنت –